হত্যাৰ ষড়যন্ত্ৰৰ অভিযোগ উত্থাপিত হ’ল ইমৰান খানৰ বিৰুদ্ধে, তৰা হৈছে গোচৰ

ডিজিটেল ডেস্কঃ হত্যাৰ ষড়যন্ত্ৰৰ অভিযোগ উত্থাপিত হৈছে ইমৰান খানৰ বিৰুদ্ধে। পাকিস্তানৰ প্ৰাক্তন প্ৰধানমন্ত্ৰী তথা পিটিআইৰ চেয়াৰমেন ইমৰান খানৰ বিৰুদ্ধে এই অভিযোগ আনিছে পাকিস্তান মুছলিম লীগ-নাৱাজৰ নেতা মহছিন ছেহনাৱাজ ৰানঝাই। ৰানঝাই শনিবাৰে খানৰ বিৰুদ্ধে এটা গোচৰো তৰিছে।

উল্লেখ্য যে শুক্ৰবাৰে পাকিস্তানৰ ইছলামাবাদস্থিত নিৰ্বাচনী আয়োগৰ কাৰ্যালয়ৰ সমুখত ব্যাপক উত্তপ্ত পৰিস্থিতিৰ সৃষ্টি হৈছিল। ইমৰাণ খানৰ পিটিআই দলৰ কৰ্মী আৰু সমৰ্থকসকলে আয়োগৰ কাৰ্যালয়ৰ সমুখত ধৰ্ণা প্ৰদৰ্শন কৰি আছিল। তেনেসময়তে মুছলিম লীগ নাৱাজৰ নেতা ৰাণঝাক উক্ত স্থানত আক্ৰমণ কৰা হয়।

তাৰপাছদিনাই ৰানঝাই ইছলামাবাদৰ চেক্ৰেটেৰিয়েট আৰক্ষী চকীত এটা গোচৰ তৰিছে। আৰক্ষীক দিয়া এজাহাৰত তেওঁ অভিযোগ কৰে যে নিৰ্বাচনী আয়োগৰ কাৰ্যালয়ৰ সমুখত তেওঁক হত্যাৰ চেষ্টা কৰা হৈছিল। এই হত্যাৰ পৰিকল্পনাত পিটিআইৰ নেতৃত্ব তথা ইমৰান খানৰ হাত আছে বুলিও তেওঁ অভিযোগ কৰে।