ইডিৰ জিম্মাত আছে কেজৰিৱাল; দিল্লীত পত্নী সুনীতা কেজৰিৱালে আৰম্ভ কৰিলে ‘কেজৰিৱাল কো আশীৰ্বাদ’ শীৰ্ষক বিশেষ কেম্পেইন

আজি সুনীতা কেজৰিৱালে আৰম্ভ কৰিলে ‘কেজৰিৱাল কো আশীৰ্বাদ’ শীৰ্ষক এক বিশেষ কেম্পেইনৰ। যাৰ জৰিয়তে সাধাৰণ ৰাইজক কেজৰিৱালক আশীৰ্বাদ দিবলৈ আহ্বান জনালে মুখ্যমন্ত্ৰীগৰাকীৰ পত্নী সুনীতা কেজৰিৱালে। ৱাটছএপৰ জৰিয়তে অৰৱিন্দ কেজৰিৱালক আশীৰ্বাদ দিবলৈ এক বিশেষ হোৱাটছএপ নম্বৰ জাৰি কৰিলে সুনীতা কেজৰিৱালে৷

ইপিনে কেজৰিৱালৰ বন্দিত্বক লৈ পুনৰবাৰ ইডি আৰু বিজেপিৰ বিৰুদ্ধে আক্ৰমণাত্মক হৈ পৰিল আপ নেতৃত্ব। ইডিক বিজেপিৰ ৰাজনৈতিক অস্ত্ৰ বুলি কটাক্ষ কৰিলে দলটোৰ শীৰ্ষ নেতা আতিশী মাৰ্লেনাই। 

আনহাতে কেজৰিৱালক গ্ৰেপ্তাৰক লৈ সৰব হৈ পৰিছে বিৰোধী মৰ্চা ‘ইণ্ডিয়া’ৰ নেতৃত্ব। ৩১ মাৰ্চত নতুন দিল্লীৰ ৰামলীলা ময়দানত কেজৰিৱালৰ গ্ৰেপ্তাৰৰ বিৰুদ্ধে প্ৰতিবাদী ৰেলীত অংশ লোৱাৰ বাবে জনতাক আহ্বান জনালে ইণ্ডিয়া মৰ্চাই। ইপিনে কেজৰিৱালৰ গ্ৰেপ্তাৰৰ প্ৰসংগত আমেৰিকা আৰু জাৰ্মানীৰ পাছত এইবাৰ সৰব হৈ পৰিছে ৰাষ্ট্রসংঘ। আন্তঃৰাষ্ট্রীয় সংস্থাটোৰ মজিয়াত চৰ্চিত হ’ল কেজৰিৱালৰ গ্ৰেপ্তাৰৰ প্ৰসংগ। ৰাষ্ট্রসংঘৰ সচিব প্ৰধানৰ প্ৰবক্তাই এই সন্দৰ্ভত এক বিবৃতি জাৰি কৰি সকলোৰে অধিকাৰ সুৰক্ষিত ৰখাৰ বাবে জনালে আহ্বান। ইতিপূৰ্বে আপ নেতাগৰাকীক গ্ৰেপ্তাৰক লৈ জাৰ্মানী আৰু আমেৰিকাই প্ৰকাশ কৰিছিল তীব্ৰ প্ৰতিক্ৰিয়া। যাৰ বিৰুদ্ধে নিজৰ স্থিতি স্পষ্ট কৰি দুয়োখন ৰাষ্ট্রৰ নতুন দিল্লীস্থ কূটনীতিবিদক তলব কৰিছিল ভাৰতে।