ডিজিটেল ডেস্কঃ দেশৰ অৰ্থনীতি কিছুবছৰৰ পিছতে আমেৰিকা আৰু চীনৰ পিছতে তৃতীয় স্থানত থকা অৰ্থনীতি হ’ব বুলি বিশেষ মহলে প্ৰচাৰ চলাই থকাৰ সময়তে দেশত বন্ধ হ’ল আন এটা বেংক। ৰিজাৰ্ভ বেংকে শেহতীয়াকৈ বন্ধ কৰি দিছে মহাৰাষ্ট্ৰৰ লক্ষ্মী সমবায় বেংক।ইতিমধ্যে বেংকটো বন্ধ কৰি ইয়াৰ অনুজ্ঞাপত্ৰও বাতিল কৰা হৈছে।
ভাৰতীয় ৰিজাৰ্ভ বেংকে বিভিন্ন বেংকৰ বাবে নিৰ্দেশনা জাৰি কৰি আহিছে । কিন্তু এইবাৰ নতুন নিৰ্দেশনাৱলীত এটা বেংক বন্ধ কৰাৰেই নিৰ্দেশ দিয়া হৈছে।
ভাৰতীয় ৰিজাৰ্ভ বেংকে সমগ্ৰ দেশৰ সকলো বেংকিং আইন পৰিদৰ্শন কৰে। যদি দেশৰ সকলো বেংকে বেংকিং নিয়ম সঠিকভাৱে অনুসৰণ নকৰে তেন্তে আৰবিআইয়ে প্ৰায়ে বেংকসমূহৰ বিৰুদ্ধে কিছুমান গুৰুত্বপূৰ্ণ পদক্ষেপ লয়।কেইদিনমান আগতে ভাৰতীয় ৰিজাৰ্ভ বেংকে বিভিন্ন সমবায় বেংক সন্দৰ্ভত অধিক কঠোৰ মনোভাব গ্ৰহণ কৰিছে। এনে স্থিতিৰ পৰিপ্ৰেক্ষিততে এইবাৰ সমবায় বেংকসমূহৰ ওপৰত নতুন নিষেধাজ্ঞা আৰোপ কৰা হৈছে।
আৰ.বি.আই.-য়ে মহাৰাষ্ট্ৰত লক্ষ্মী সমবায় বেঙ্কৰ অনুজ্ঞাপত্ৰ বাতিল কৰাৰ পিছতে বেংকটোৰ গ্ৰাহকসকলৰ মাজত হাহাকাৰ লাগিছে। বেংকৰ অনুজ্ঞাপত্ৰ বাতিল হোৱাৰ বাবে গ্ৰাহকসকলে আৰু বেংকটোৰ জৰিয়তে লেনদেন কৰিব নোৱাৰিব। ৰিজাৰ্ভ বেংকৰ পৰা ৫ লাখ টকালৈকে গ্ৰাহকৰ জমা ঘূৰাই দিয়াৰ ব্যৱস্থা কৰিছে বুলি জানিব পৰা গৈছে।
ডি.আই.চি.জি.চি.-ৰ তত্বাৱধানত গ্ৰাহকসকলক ৫ লাখ টকালৈকে সম্পূৰ্ণ ধন ঘূৰাই দিয়া হ'ব। কিন্তু সমস্যাটো হ'ল যদি কোনোৱাই ইয়াতকৈ অধিক ধন বেংকটোত জমা কৰিছিল তেন্তে তেনে গ্ৰাহকৰ বাকী ধনৰাশি আৰু ঘূৰাই নাপাব। ফলত ৫ লাখতকৈ বেছি ধন জমা কৰা সকলৰ মূৰত সৰগ ভাগি পৰিছে। কেৱল লক্ষ্মী কো-অপাৰেটিভ বেংকেই নহয়, পুনেস্থিত ৰূপী কো-অপাৰেটিভ বেংক লিমিটেডো বন্ধ কৰি দিয়া হৈছে।
ভাৰতীয় ৰিজাৰ্ভ বেঙ্কৰ সূত্ৰ অনুসৰি ৰূপী কো-অপাৰেটিভ বেংক লিমিটেডৰ পৰ্যাপ্ত মূলধন নাই আৰু উপাৰ্জনৰ বিশেষ কোনো সম্ভাৱনাও নাই। সেইকাৰণে আৰবিআইয়ে সংশ্লিষ্ট বেংকৰ অনুজ্ঞাপত্ৰ বাতিল কৰিছে। ২২ ছেপ্টেম্বৰত বেংকটোৱে সকলো লেনদেন বন্ধ কৰিছে।
Continue Reading
