মন্ত্ৰীৰ নিৰ্দেশৰ পিছতেই সাৰ পালে আবকাৰী বিভাগে; বোকাখাতত বৃহৎ পৰিমাণৰ অবৈধ লালী গুৰ জব্দ, এজন আটক

ডিজিটেল ডেস্ক: অৱশেষত যেন টোপনি ভাঙিল বোকাখাতৰ আবকাৰী বিভাগৰ। দীৰ্ঘদিন ধৰি টোপনি গৈ থকা বিভাগটোৱে মন্ত্ৰীৰ কাঢ়া নিৰ্দেশ পোৱাৰ পিছতেই এতিয়া গা জোকাৰি উঠিছে। শেহতীয়াকৈ বোকাখাতত আবকাৰী বিভাগে এক অভিযান চলাই বৃহৎ পৰিমাণৰ অবৈধ লালী গুৰ জব্দ কৰাৰ লগতে এজন ব্যৱসায়ীক আটক কৰিবলৈ সক্ষম হৈছে।

যদিও বৰ্তমান আবকাৰী বিভাগটো মন্ত্ৰী অতুল বৰাৰ অধীনত নাই, তথাপিও দুদিন পূৰ্বে বোকাখাত সমজিলা আয়ুক্তৰ কাৰ্যালয়ত অনুষ্ঠিত সকলো বিভাগৰ এক বৈঠকত মন্ত্ৰীগৰাকীয়ে অবৈধ চুলাই মদৰ বিৰুদ্ধে কঠোৰ ব্যৱস্থা ল’বলৈ আবকাৰী বিভাগক স্পষ্ট নিৰ্দেশ দিছিল। আশ্চৰ্যজনক কথাটো হ’ল, মন্ত্ৰীৰ এই নিৰ্দেশৰ পিছতহে যেন সাৰ পালে স্থানীয় আবকাৰী বিভাগে।

উল্লেখ্য যে, বোকাখাত আবকাৰী বিভাগৰ বিৰুদ্ধে দীৰ্ঘদিনৰে পৰা অবৈধ চুলাই মদৰ ব্যৱসায়ীৰ সৈতে গোপন বুজাবুজি থকাৰ এক গুৰুতৰ বদনাম আছিল। আনকি, এই সন্দৰ্ভত বিভাগটোৰ এগৰাকী বিষয়াইও আওপকীয়াকৈ এনে ভিতৰুৱা বুজাবুজি থকাৰ কথা স্বীকাৰ কৰিছে।

মন্ত্ৰীৰ নিৰ্দেশ লাভ কৰাৰ পিছত শনিবাৰে আৰক্ষী, দণ্ডাধীশ, খাদ্য আৰু অসামৰিক যোগান বিভাগ তথা আবকাৰী বিভাগে যৌথভাৱে এক অভিযান চলায়। বোকাখাতৰ আনন্দপুৰ চাহ বাগিচাৰ সমীপত থকা সন্তোষ সিং যাদৱ নামৰ এজন ব্যক্তিৰ গুৰৰ গুদামত এই অভিযান চলোৱা হয়। অভিযানকাৰী দলে গুদামটোৰ পৰা প্ৰায় ৪৫ টিন অবৈধ লালী গুৰ জব্দ কৰে।

ব্যৱসায়ী সন্তোষ সিং যাদৱৰ ওচৰত খোৱা গুৰ আৰু পশুধনৰ বাবে গুৰ মজুত ৰখাৰ চৰকাৰী অনুজ্ঞা পত্ৰ (লাইচেন্স) আছিল যদিও, অবৈধভাৱে লালী গুৰ ৰখাৰ কোনো অনুমতি নাছিল। আৰক্ষী আৰু আবকাৰী বিভাগে গুদামটোৰ সকলো নথিপত্ৰ তন্ন তন্নকৈ পৰীক্ষা কৰাৰ পিছত, অবৈধ লালী গুৰ মজুত ৰখাৰ অপৰাধত ব্যৱসায়ী সন্তোষ সিং যাদৱক আটক কৰিছে। বৰ্তমান ধৃত ব্যৱসায়ীজনক অধিক সোধাপোছা অব্যাহত ৰখা হৈছে।