ইমৰান খান জীৱিত কিন্তু মানসিকভাৱে বিধ্বস্ত

ডিজিটেল ডেস্ক: পাকিস্তানৰ প্রাক্তন প্রধানমন্ত্রী ইমৰান খানৰ হত্যাৰ বাতৰিক লৈ সমগ্র দেশখনত উত্তেজনা চলি থকাৰ মাজতে মঙলবাৰে তেওঁক বন্দী কৰি ৰখা জেললৈ যাবৰ বাবে অনুমতি দিয়া হয় ইমৰান খানৰ ভগ্নী ড° উজমা খাতুনক। ৰাৱালপিণ্ডিৰ আদিয়ালা জেলত জ্যেষ্ঠ ভাতৃ ইমৰানৰ সৈতে ২০ মিনিট জোৰা সাক্ষাতৰ পাছত উজমা খাতুনে মঙলবাৰে বিয়লি কয় যে পাকিস্তানৰ প্রাক্তন প্রধানমন্ত্রী ইমৰান খান জীৱিত অৱস্থাত আছে, কিন্তু তেওঁক ব্যাপক হাৰত মানসিক নির্যাতন চলোৱা হৈছে।

পাকিস্তান তেহৰিক-ই-ইনছাফে (পি টি আই) ইমৰান খানৰ ভগ্নীৰ উদ্ধৃতিৰে এটা বিবৃতিত কয় যে ৰাৱালপিণ্ডিৰ আদিৱালা জেলত ইমৰান খানৰ জীৱন সংকটাপূৰ্ণ হৈ পৰিছে। পি টি আয়ে কয় যে দেশখনৰ সামৰিক প্রশাসনে প্রাক্তন প্রধানমন্ত্রীজনক হত্যাৰ পৰিকল্পনা কৰিছে। আছিম মুনিৰৰ সামৰিক বাহিনীয়ে তেওঁক এটা অকলশৰীয়া অন্ধকাৰ কোঠাত পর্যাপ্ত খাদ্য, বিজুলিৰ পোহৰ, ঔষধ নোহোৱাকৈ বন্দী কৰি থৈছে।

মৌলিক সুবিধাৰ পৰাও তেওঁক বঞ্চিত কৰা হৈছে বুলি পি টি আয়ে বিবৃতিটোত প্রকাশ কৰে। আনহাতে, জ্যেষ্ঠ ভাতৃক সাক্ষাত কৰাৰ পাছত ভগ্নী ড° খাতুনে সাংবাদিকক কয় যে ইমৰান খান ঠিকে আছে, কিন্তু তেওঁক অমানুষিক মানসিক নির্যাতন চলোৱা হৈছে। সকলো সময়তে তেওঁক কাৰাগাৰৰ কুঠৰীত বন্দী কৰি ৰখা হয় আৰু কাৰো সৈতে যোগাযোগ কৰিবলৈ দিয়া নহয়।

খাতুনে অভিযোগ কৰে যে পাকিস্তানত এতিয়া সবাতোকৈ শক্তিশালী হৈ পৰা জেনেৰেল আছিম মুনিৰে এতিয়া সমগ্র দেশখনত সামৰিক আৰু সংবিধানৰ দায়িত্ব লৈছে। দেশখনত অধিক ক্ষমতাশালী হ'বলৈ আছিম মুনিবে ইমৰান খানক অধিক মানসিক নির্যাতন চলাই আছে বুলি ভগ্নী উজুমা খাতুনে অভিযোগ কৰে। ইছলামাবাদ আৰু ৰাৱালপিণ্ডিত ইমৰান খানৰ নেতৃত্বাধীন দল, পি টি আইৰ সমর্থকে প্রতিবাদ সাব্যস্ত কৰাৰ পাছতেই কাৰাবন্দী নেতাজনক সাক্ষাতৰ অনুমতি দিয়ে চৰকাৰী কৰ্তৃপক্ষই।

উৎসঃ দৈনিক জনমভূমি