ইন্দোৰ হ'ব দেশৰ প্ৰথমখন ডিজিটেল মহানগৰ

ডিজিটেল ডেস্ক : পৰিষ্কাৰ-পৰিচ্ছন্নতাত দেশৰ ভিতৰত শীৰ্ষ স্থানত থকা ইন্দোৰ মহানগৰ ডিজিটেল যুগত প্ৰৱেশৰ পথত আগবাঢ়িছে। অচিৰেই ইন্দোৰ দেশৰ ভিতৰত প্ৰথমখন ডিজিটেল মহানগৰত পৰিণত হ'ব। মহানগৰখনত অচিৰেই ডিজিটেল ঠিকনা প্রণালী আৰম্ভ কৰা হ'ব। ইয়াৰ পাইলট প্রকল্প মহানগৰখনৰ ৮২ নম্বৰ বাৰ্ডৰ সুদামা নগৰ অঞ্চলৰ পৰা আৰম্ভ কৰা হৈছে। ইয়াৰ অধীনত অঞ্চলটোৰ পাছলৈ মহানগৰখনৰ প্ৰতিটো ঘৰত 'ইউনিক ডিজিটেল এড্রেছ ক'ড (ডি এ চি) লগোৱা হ'ব।

মহানগৰখনৰ মেয়ৰ পুষ্প মিত্রই আৰম্ভ কৰা এই পাইলট প্রকল্প কেন্দ্রীয় চৰকাৰৰ ডিজিপিন প্লেটফৰ্মৰ সৈতে জড়িত। কেন্দ্ৰীয় চৰকাৰৰ এই প্রকল্প গ্রহণ কৰা ইন্দোৰ দেশৰ প্ৰথমখন মহানগৰ। পৰীক্ষামূলকভাবে এই প্ৰকল্পৰ অধীনত প্ৰতিটো ঘৰত এখন ডিজিটেল ফলক লগোৱা হ'ব। ইয়াত জি পি এছ আধাৰিত এড্ৰেছ ক'ডৰ লগতে কিউ আপ ক'ড, পৰিষ্কাৰ-পৰিচ্ছন্নতাৰ ৰেটিং আৰু আন সেবাসমূহৰ তথ্য থাকিব।

কিউ আৰ ক'ড স্কেন কৰাৰ লগে লগে নাম, কৰ, পৰিষ্কাৰ-পৰিচ্ছন্নতাৰ পৰ্যায়, অভিযোগকে ধৰি নাগৰিকৰ সৈতে জড়িত প্ৰায় সকলো তথ্য ম'বাইলত দেখা পোৱা যাব। নগৰখনৰ আযুক্তৰ মতে এই ডিজিটেল পদক্ষেপে ইন্দোৰক স্মার্ট গভর্নেন্সৰ দিশত আগবঢ়াই নিব। ই সেবাসমূহ অধিক নিকা কৰিব আৰু অভিযোগ নিৰাময় ব্যৱস্থা ক্ষিপ্ৰ কৰি তুলিব।

উৎসঃ দৈনিক জনমভূমি