ডিজিটেল ডেস্কঃ প্ৰথম বলতে আউট বিৰাট কোহলী! ৰাজস্থান ৰয়েলছৰ বিৰুদ্ধে বাংগালুৰুৰ এম চিন্নস্বামী ষ্টেডিয়ামত চলি থকা আই পি এলৰ মেচখনৰ ইনিংছ মুকলি কৰিবলৈ আহিয়ে গ’ল্ডেন ডাকৰ সন্মুখিন হ’বলগা হয় কিং কোহলী।
স্পীড ষ্টাৰ ট্ৰেণ্ট ব’ল্টৰ এটা দূৰ্দান্ত বলত এলবিডব্লিউ হয় কোহলী। আইপিএলত কোহলীৰ এয়া দশমটো ডাক। ইয়াৰে ৭টা গ’ল্ডেন ডাক।
উল্লেখ্য যে বাংগালুৰুৰ নিয়মীয়া অধিনায়ক ফাফ ডু প্লেছিছৰ ফিটনেছৰ অনিশ্বয়তাৰ বাবে বিৰাট কোহলীয়ে অধিনায়কত্ব অব্যাহত ৰাখিছে। ২০২১ চনত এই ভূমিকা ত্যাগ কৰিছিল কোহলীয়ে। চলিত সপ্তাহৰ আৰম্ভণিতে পঞ্জাব কিংছৰ বিৰুদ্ধে অধিনায়কত্বৰ ভূমিকা পালন কৰে তেওঁ। মেচখনত জয়ী হয়। তাৰপাছতে পিছত কোহলীক ৰাজস্থান ৰয়েলছৰ বিৰুদ্ধেও নেতৃত্ব দিবলৈ কোৱা হয়।
ৰাজস্থানৰ অধিনায়ক সঞ্জু চেমছনে টছত জয়লাভ কৰি বেংগালুৰুত প্ৰথমে বলিং কৰাৰ সিদ্ধান্ত লোৱাৰ পিছত মেচখনৰ প্ৰথম অভাৰৰ প্ৰথমটো বলতে কোহলী আউট হয়।। ব’ল্টে নিজৰ ট্ৰেডমাৰ্ক ইনছুইংগাৰেৰে কোহলীক এলবিডব্লিউ কৰে। কোহলীয়ে ফ্লিক শ্বট খেলিবলৈ বিচাৰিছিল, কিন্তু ব্যৰ্থ হয়।
আনহাতে, ২০১৯ চনৰ বিশ্বকাপতো নিউজিলেণ্ডৰ স্পীডষ্টাৰ ট্ৰেণ্ট ব’ল্টে কোহলীক শূণ্য ৰাণতে আউট কৰিছিল। বিশ্বকাপৰ ছেমি ফাইনেল মেচখনত ভাৰত আৰু নিউজিলেণ্ড মুখামুখি হৈছিল। তেতিয়া কোহলীক প্ৰথমটো বলতে আউট কৰিছিল ব’ল্টে।
ইয়াৰ দ্বাৰা ব’ল্টে আই পি এলত ১০০ সংখ্যক উইকেট লাভ কৰে। এই ১০০টা উইকেটৰ ভিতৰত ৪৬টা পাৱাৰপ্লেত আৰু ২১টা প্ৰথম অভাৰত লাভ কৰিছে তেওঁ।
Continue Reading
