ডিজিটেল ডেস্কঃ প্ৰযুক্তিয়ে মানুহক ক’ৰ পৰা ক’লৈ নিছে সেয়া ভাবিলেও আচৰিত লাগে। উত্তৰ প্ৰদেশৰ চুলতানপুৰত ঘটিছে এক হৃদয় বিদাৰক ঘটনা। এজন স্বামীয়ে তেওঁৰ পত্নীক সন্তানৰ সন্মুখত শ্বাসৰুদ্ধ কৰি হত্যা কৰিছে।পত্নীৰ অপৰাধ হ’ল ইনষ্টাগ্ৰামত স্বামীতকৈ তেওঁৰ ফলোৱাৰ বেছি । এই ঘটনাৰ পিছতে মহিলাগৰাকীৰ পিতৃয়ে অভিযুক্ত স্বামীৰ বিৰুদ্ধে গোচৰ ৰুজু কৰিছে। আৰক্ষীয়ে লোকজনক নিজৰ জিম্মাত লৈছে আৰু অনুসন্ধান আৰম্ভ কৰিছে।
কোৱা হৈছে যে লোকজনে তেওঁৰ পত্নীক তেওঁৰ চৰিত্ৰৰ বিষয়ে সন্দেহ কৰিছিল, যাৰ বাবেই তেওঁ এই ঘটনাটো সংঘটিত কৰিছে। জানিব পৰা মতে ইনষ্টাগ্ৰামত বহুতেই মহিলাগৰাকীক অনুসৰণ কৰিছিল। ইয়াৰ উপৰি মহিলাগৰাকীয়ে তেওঁৰ স্বামীক ইনষ্টাগ্ৰামত ব্ল’ক কৰিছিল।
আৰক্ষীয়ে জনোৱা অনুসৰি, উন্নাও জিলাৰ ৰাহুল মিশ্ৰাই ২০০৮ চনত ৰায়বৰেলী জিলাৰ মনিকা গুপ্তাৰ সৈতে প্ৰেমৰ সূত্ৰে বিবাহপাশত আৱদ্ধ হৈছিল। ৰাহুলে পিছত তেওঁৰ পৰিয়ালৰ সৈতে লক্ষ্ণৌলৈ স্থানান্তৰিত হৈছিল। দেওবাৰে নিশা তেওঁ তেওঁৰ গাড়ীৰে ৰায়বৰেলীলৈ ৰাওনা হৈছিল। সেই সময়তে স্বামী আৰু পত্নীৰ মাজত তৰ্ক আৰম্ভ হৈছিল আৰু ৰাহুলে তেওঁৰ দুই সন্তানৰ সন্মুখত তেওঁৰ পত্নীক শ্বাসৰুদ্ধ কৰি হত্যা কৰিছিল।
একে সময়তে, পত্নীক হত্যা কৰাৰ পিছত, ৰাহুল গাড়ীতে বহি আছিল। গাওঁৰক্ষী বাহিনীৰ টহলদাৰী দলে ঘটনাটোৰ বিষয়ে জানিব পাৰি আৰক্ষীক অৱগত কৰিছিল। আৰক্ষীৰ আগমনৰ পিছত ৰাহুলে গাড়ীৰ দুৱাৰ খুলি দিছিল। মহিলাগৰাকীৰ পিতৃৰ অভিযোগ আৰু শিশুসকলৰ ভাষ্য অনুসৰি ৰাহুলৰ বিৰুদ্ধে এটা গোচৰ ৰুজু কৰা হৈছে আৰু তেওঁক জিম্মাত লোৱা হৈছে।
Continue Reading
