ডিজিটেল ডেস্কঃ ভাৰত এখন শান্তিপ্ৰিয় দেশ। কিন্তু ভাৰতত নিৰন্তৰ অস্থিৰতাই বিৰাজ কৰিছে । কাশ্মীৰ বিবাদেই হওঁক বা আন কোনো কাৰণতেই হওঁক ভাৰতৰ ক’ৰবাত নহয় ক’ৰবাত অশান্তি হৈয়েই থাকে। এনে অশান্তি প্ৰতিহত কৰিবলৈয়েই সময়ে সময়ে ইণ্টাৰনেট সেৱা বন্ধ কৰিবলগীয়াও হয়। ইণ্টাৰনেট বন্ধ কৰাৰ ক্ষেত্ৰত ভাৰত বিশ্বৰ আন দেশৰ তুলনাত প্ৰথম স্থানত আছে।
ইণ্টাৰনেট বন্ধৰ কৰাৰ বিষয়কলৈ আন্তৰ্জাতিক নিৰীক্ষণ সংস্থাই প্ৰকাশ কৰা তথ্য অনুসৰি ২০২২ চনত সমগ্ৰ বিশ্বত ইণ্টাৰনেট মুঠ ১৮৭ বাৰ বন্ধ কৰা হৈছিল। ইয়াৰ ভিতৰত কেৱল ভাৰতত ৮৪ বাৰ ইণ্টাৰনেট বন্ধ কৰা হৈছিল। সেই সময়ছোৱাত বিশ্বৰ আন দেশত ইণ্টাৰনেট মুঠ ১০৩ বাৰ বন্ধ কৰা হৈছে। যুদ্ধবিধ্বস্ত ইউক্ৰেইন ইণ্টাৰনেট বন্ধ কৰাৰ ক্ষেত্ৰত ভাৰতৰ পিছতে দ্বিতীয় স্থানত আছে।
২০২২ চনত জেলেনস্কিৰ নিৰ্দেশত ইউক্ৰেইনত ২২ বাৰ ইণ্টাৰনেট বন্ধ কৰা হৈছিল। পৰিসংখ্যা অনুসৰি ৮৪ বাৰৰ ভিতৰত কেৱল জম্মু আৰু কাশ্মীৰতে যোৱা বছৰ ৪৯ বাৰ ইণ্টাৰনেট বন্ধ কৰা হৈছিল। ২০২২ চনৰ জানুৱাৰী আৰু ফেব্ৰুৱাৰী মাহত প্ৰশাসনে উপত্যকাটোত একেৰাহে ১৬ বাৰ ইণ্টাৰনেট বন্ধৰ নিৰ্দেশ দিছিল।
২০১৯ চনত কাশ্মীৰৰ বিশেষ ৰাজ্যৰ মৰ্যাদা প্ৰত্যাহাৰ কৰাৰ পিছত কাশ্মীৰত বহুবাৰ ইণ্টাৰনেট বন্ধ কৰি দিয়া হৈছে।দৰাচলতে ২০১৭ চনৰ পৰাই ইণ্টাৰনেট বন্ধ কৰাৰ ক্ষেত্ৰত ভাৰত বিশ্বৰ শীৰ্ষ স্থানত আছে। যিটো নৰেন্দ্ৰ মোদী চৰকাৰৰ বাবে একেবাৰে ইতিবাচক কথা নহয় বুলি বহুতে মন্তব্য কৰিছে। । বহুতে কৈছে যে ইণ্টাৰনেট বন্ধৰ পৰিসংখ্যাই প্ৰমাণ কৰে যে মোদীৰ শাসনত যোৱা কেইবছৰমানত দেশত অস্থিৰতা আৰু অসহিষ্ণুতা দুয়োটাই বৃদ্ধি পাইছে।
Continue Reading
