ইউক্ৰেইনৰ পৰা আধাতে শিক্ষা সামৰি উভতি অহা মেডিকেল শিক্ষাৰ্থীৰ ভৱিষ্যত কি হ’ব? কেন্দ্ৰই ক’লে একো কৰিব নোৱাৰো

 শেহতীয়াকৈ পশ্চিমবংগৰ টিএমচিয়ে দাবী কৰিছিল যে কেন্দ্ৰই তেওঁলোকৰ অসম্পূৰ্ণ পাঠ্যক্ৰম সম্পূৰ্ণ কৰাৰ পিছত চাকৰি পোৱাৰ বিষয়টো চোৱা-চিতা কৰিব লাগে। বংগৰ মুখ্যমন্ত্ৰীয়ে নিজেই কেন্দ্ৰৰ ওচৰত একেই দাবী কৰিছিল। তৃণমূলৰ সাংসদ সুদীপ বন্দোপাধ্যায়েও সংসদত বিষয়টো উত্থাপন কৰিছিল। সাংসদগৰাকীয়ে  জানিব বিচাৰিছিল যে কেন্দ্ৰই শিক্ষাৰ্থীসকলক কিমান সহায় কৰিব পাৰে। 

এইবাৰ কেন্দ্ৰীয় স্বাস্থ্য মন্ত্ৰী মনসুখ মাণ্ডৱিয়াই তেওঁলৈ এখন পত্ৰ প্ৰেৰণ কৰিছে। পত্ৰখনত কেন্দ্ৰই স্পষ্ট কৰি দিছে যে ভাৰতীয় চিকিৎসা পৰিষদ আৰু সংশ্লিষ্ট অন্যান্য নিয়ামক সংস্থাৰ নিয়ম অনুসৰি এই শিক্ষাৰ্থীসকলক সহায় কৰিবলৈ কেন্দ্ৰৰ বিশেষ একো কৰিবলগীয়া নাই। এই সন্দৰ্ভত  নিয়মৰ কথা উল্লেখ কৰি মাণ্ডৱিয়াই কেন্দ্ৰৰ দায়বদ্ধতাৰ কথা কয়।

তিনিটা নিয়ামক সংস্থাৰ নিয়ম - ৰাষ্ট্ৰীয় চিকিৎসা পৰিষদ (এনএমচি) আইন ২০১৯, ভাৰতীয় চিকিৎসা পৰিষদ (আইএমচি) আইন, ১৯৫৬ আৰু বিদেশী স্নাতক অনুজ্ঞা নিয়মাৱলীৰ স্ক্ৰীণিং পৰীক্ষা নিয়মাৱলী ২০০২ ত স্পষ্টভাৱে কোৱা হৈছে যে বিদেশৰ যিকোনো বিশ্ববিদ্যালয়ৰ শিক্ষাৰ্থীসকলক ভাৰতীয় প্ৰতিষ্ঠানত অধ্যয়ন কৰিবলৈ অনুমতি দিব নোৱাৰি, বা তেওঁলোকক বিদেশৰ প্ৰতিষ্ঠানৰ পৰা স্থানান্তৰো কৰিব নোৱাৰি। কেন্দ্ৰীয় মন্ত্ৰী মান্দাৱিয়াই পত্ৰখনত এইকথা উল্লেখ কৰিছে। এই সন্দৰ্ভত, তেওঁ স্পষ্ট কৰি দিছে যে ৰাছিয়া -ইউক্ৰেইনৰ যুদ্ধৰ পৰিপ্ৰেক্ষিতত দেশলৈ উভতি আহিব লগা চিকিৎসা বিদ্যাৰ্থীসকলে সংশ্লিষ্ট বিশ্ববিদ্যালয়তেই পঢ়া-শুনা সম্পূৰ্ণ কৰিব লাগিব আৰু তাৰ পৰাই প্ৰমাণপত্ৰ প্ৰাপ্ত কৰিব লাগিব।

মান্দাৱিয়াই লগতে কয় যে ভাৰতৰ চিকিৎসা প্ৰতিষ্ঠানসমূহৰ নিয়ম অনুসৰি, যদি কোনোবাই বিদেশৰ পৰা চিকিৎসা বিজ্ঞানৰ পৰীক্ষাত উত্তীৰ্ণ হৈ দেশলৈ উভতি অহাৰ পিছত অনুশীলন কৰিব বিচাৰে, তেন্তে তেওঁ বিদেশী চিকিৎসা বিদ্যাৰ্থী স্নাতক পৰীক্ষাত বহিব লাগিব। যদি তেওঁ উত্তীৰ্ণ হয় তেন্তে তেওঁ  ভাৰতত চিকিৎসা সেৱা কৰাৰ সুযোগ পাব। প্ৰথমতে, সম্ভাৱ্য চিকিৎসকসকলে দুবছৰীয়া বাধ্যতামূলক  চিকিৎসা ইন্টাৰ্ণশ্বিপ কৰিব লাগিব। তেওঁলোকে ভাৰতৰ চিকিৎসা ব্যৱস্থাৰ সৈতে  সম্পূৰ্ণৰূপে অভ্যস্ত হোৱাৰ পিছতহে চিকিৎসা বৃত্তিত প্ৰৱেশ কৰিবলৈ অনুমতি লাভ কৰিব।