ডিজিটেল ডেস্কঃ আন্তঃৰাষ্ট্ৰীয় ফুটবলৰ পৰা অৱসৰ লোৱাৰ কথা ঘোষণা কৰে থমাছ মুলাৰে। ২০১৪ চনত বিশ্বকাপ জয় কৰা ফুটবলাৰগৰাকীয়ে ইউৰো কাপৰ ফাইনেলৰ পিছত ভিডিঅ’ বাৰ্তাযোগে অৱসৰৰ কথা ঘোষণা কৰে। ইউৰো কাপৰ কোৱাৰ্টাৰ ফাইনেলত স্পেইনৰ বিৰুদ্ধে শেষৰখন খেল খেলিছিল।
ইউৰো কাপৰ পৰা জাৰ্মানীয়ে বাহিৰ হোৱাৰ পিছৰে পৰা গুঞ্জৰিত হৈ আহিছে এই অৱসৰৰ কথা। জাৰ্মান ষ্ট্ৰাইকাৰগৰাকীয়ে আন্তঃৰাষ্ট্ৰীয় ফুটবলৰ পৰা অৱসৰ লোৱাৰ কথা ঘোষণা কৰে। জাতীয় দলৰ হৈ ১৩১খন খেল খেলি ৪৫টা গ’ল দিয়ে। ২০১০ চনত আৰ্জেণ্টিনাৰ বিৰুদ্ধে অভিষেক ঘটায় মুলাৰে। জাৰ্মানীৰ হৈ সৰ্বাধিক খেলৰ তালিকাত তৃতীয় স্থানত আছে ৩৪ বছৰীয়া ফুটবলাৰগৰাকী। দেশৰ হৈ সৰ্বাধিক ১৫০খন খেল খেলিছিল লোথাৰ মেথিউছে।
২০১০ চনৰ বিশ্বকাপত যুৱ মুলাৰে চকু কপালত তুলিছিল। জাৰ্মানীয়ে ছেমি ফাইনেললৈ যোৱাৰ পথত তেওঁৰ ভৰিৰ পৰা ৫টা গ’ল। তেওঁ শীৰ্ষ গ’লদাতাৰ বাবে গোল্ডেন বুট লাভ কৰে। ২০১৪ চনৰ বিশ্বকাপতো তেওঁ ৫টা গ’ল দিছিল। গ্ৰুপ পৰ্যায়ত পৰ্তুগালৰ বিৰুদ্ধে হেট্ৰিক অৰ্জন কৰে। সেইবাৰৰ ছেমি ফাইনেলত ব্ৰাজিলৰ বিৰুদ্ধে জাৰ্মানীয়ে ৭-১ গ’লত জয়লাভ কৰাতো মুলাৰে অৰিহণা যোগাইছিল।
আন্তঃৰাষ্ট্ৰীয় ফুটবলৰ পৰা অৱসৰ লোৱাৰ পিছতো ক্লাবৰ হৈ খেলি থাকিব মুলাৰে। ২০২৫ চনলৈকে বায়াৰ্ন মিউনিখৰ সৈতে তেওঁৰ চুক্তি আছে। এইবাৰ ইউৰো কাপত দুখন মেচ খেলিছিল মুলাৰে।
Continue Reading
