ডিজিটেল ডেস্কঃ মণিপুৰ জ্বলিয়েই আছে। হিংসা যেন এতিয়াও নিৰ্বাপিত হোৱা নাই। আমেৰিকাই প্ৰয়োজনত মণিপুৰক সহায় কৰিব বুলি ঘোষণা কৰাৰ সময়তে ইউৰোপীয় সংসদেও মণিপুৰত জাতিগত হিংসাৰ বিষয়ত এটা প্ৰস্তাৱ গৃহীত কৰিছে। এইবাৰ ভাৰতে ইউৰোপীয় সংসদৰ প্ৰস্তাৱ গ্ৰহণৰ বিৰুদ্ধে প্ৰতিক্ৰিয়া ব্যক্ত কৰিছে । নতুন দিল্লীয়ে ইউৰোপীয় সংসদৰ ভূমিকাক সমালোচনা কৰি কয় যে এয়া "ঔপনিৱেশিক মানসিকতা"।
উল্লেখ্য প্ৰধানমন্ত্ৰী নৰেন্দ্ৰ মোদী দুদিনীয়া ফ্ৰান্স ভ্ৰমণলৈ গৈছে । একেদিনাই ষ্ট্ৰাছবাৰ্গৰ সংসদত মণিপুৰৰ মানৱ অধিকাৰ সংকট সম্পৰ্কে আলোচনা কৰা হয়। এই সন্দৰ্ভত এটা প্ৰস্তাৱো গৃহীত কৰা হয়।প্ৰস্তাৱটোত কোৱা হৈছে "ধৰ্মীয় আৰু জাতিগত সংখ্যালঘুসকলক সুৰক্ষিত কৰা উচিত" । এনে প্ৰস্তাৱ গ্ৰহণৰ পিছতে বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে কয়, "ভাৰতৰ আভ্যন্তৰীণ বিষয়ত এনে ধৰণৰ হস্তক্ষেপ গ্ৰহণযোগ্য নহয়। সংসদৰ প্ৰস্তাৱটোৱে ঔপনিৱেশিক মানসিকতাক প্ৰতিফলিত কৰিছে। "
তেওঁ লগতে ইউৰোপীয় সংসদক সমালোচনা কৰি কয় যে তেওঁলোকে তেওঁলোকৰ নিজৰ আভ্যন্তৰীণ সংকটৰ বিষয়ে আলোচনা কৰাত অধিক সময় ব্যয় কৰা উচিত। বৈদেশিক সচিব বিনয় কাটৰায়ো মণিপুৰ সংকটক দেশৰ "আভ্যন্তৰীণ" বিষয় বুলি অভিহিত কৰিছে। উল্লেখ্য ইউৰোপীয় সংসদ ইউৰোপীয় ইউনিয়নৰ নিৰ্বাচিত দেশৰ সদস্যৰে গঠিত।
Continue Reading
