ডিজিটেল ডেস্কঃ অশান্ত মণিপুৰত আন এটা বেংক লুট কৰাৰ অভিযোগ উঠিছে। দুৰ্বৃত্তই কাংপোকপি জিলাৰ মণিপুৰ ষ্টেট কোঅপাৰেটিভ বেংকৰ এটা শাখাত কম্পিউটাৰকে ধৰি ইলেক্ট্ৰনিক সামগ্ৰী লুটি নিয়া বুলি জানিব পৰা গৈছে। লুণ্ঠন কৰা সামগ্ৰীৰ বজাৰ মূল্য প্ৰায় ১ কোটি টকা।
ঘটনাটো শুক্ৰবাৰে পোহৰলৈ আহিছে।উত্তৰ-পূবৰ ৰাজ্যখন দুমাহৰো অধিক সময় ধৰি অস্থিৰ হৈ আছে। গোষ্ঠী সংঘৰ্ষত ১৫০ ৰো অধিক লোক নিহত হৈছে। এতিয়া বেংক লুটৰ দৰে ঘটনা পোহৰলৈ আহিছে। কাংপোকপিত সমবায় বেংকৰ শাখা ৪ মে'ৰ পৰা বন্ধ আছিল। আৰক্ষীয়ে জনোৱা অনুসৰি বেংকৰ কৰ্মচাৰীসকলে তিনিদিন আগতে বেংকত প্ৰৱেশ কৰি চুৰিৰ বিষয়ে জানিব পাৰিছিল।
আৰক্ষীয়ে জনোৱা অনুসৰি বেংকৰ 'কেছ ভল্ট' ভঙা অৱস্থাত পোৱা গৈছে। অৱশ্যে বেংকৰ কৰ্মচাৰীসকলে ইতিমধ্যে তাৰ পৰা টকাখিনি আঁতৰাই নিছিল। দুৰ্বৃত্তই ছটা কম্পিউটাৰ, প্ৰিণ্টাৰ আৰু অন্যান্য ইলেক্ট্ৰনিক সামগ্ৰী লুটি নিয়ে বুলি অভিযোগ কৰা হৈছে। কাংপোকপি আৰক্ষী থানাত এই সন্দৰ্ভত এখন এজাহাৰ পঞ্জীয়ন কৰা হৈছে।
১০ জুলাইত মণিপুৰত আন এটা বেংক ডকাইতিৰ ঘটনা পোহৰলৈ আহিছিল। চুৰাচান্দপুৰৰ এটা ব্যক্তিগত বেংকৰ পৰা ২.২৫ কোটি টকাৰ গহনা লুটি নিয়া হৈছিল বুলি অভিযোগ উঠিছিল।
Continue Reading
