জাগীৰোডত নাৰী দেহ ব্যৱসায়ী ঘাটি উৎখাত; স্থানীয় মহিলাই তিনি মহিলাসহ দুজন যুৱকক হাতে-লোটে ধৰি গটালে আৰক্ষীক

ডিজিটেল ডেস্ক: জাগীৰোডৰ মইনাজান কৃষ্ণ নগৰত নাৰী দেহ ব্যৱসায়ী ঘাটি উৎখাত৷ স্থানীয় মহিলাই হাতে-লোটে ধৰে তিনি মহিলাসহ দুজন যুৱকক৷ আটাইকে উত্তম-মধ্যম সোধাই স্থানীয় মহিলাই চমজালে জাগীৰোড আৰক্ষীক৷ ঘটনাস্থলীৰ পৰা পলায়ন কৰা আন তিনি যুৱককো পৰৱৰ্তী সময়ত আটক কৰে স্থানীয় লোকে৷ 

অভিযোগ অনুসৰি বিগত প্ৰায় কিছুদিন ধৰি উক্ত অঞ্চলটোত নতুনকৈ ঘৰ সাজি উজ্জ্বলা সৰকাৰ নামৰ এগৰাকী মহিলাই চলাই গৈছিল নাৰী দেহৰ ব্যৱসায়৷ দৈনিক উক্ত বিশেষ ঘৰটোলৈ বিভিন্ন স্থানৰ পৰা আগমন ঘটে অচিনাকি তথা সন্দেহজনক পুৰুষ-মহিলাৰ৷ দিনৰ পোহৰতে অনৈতিক কাৰ্যকলাপেৰে বিনষ্ট কৰিছিল সামাজিক বাতাবৰণ৷ 

স্থানীয় লোকে উজ্জ্বলা সৰকাৰ নামৰ মহিলাগৰাকীক সতৰ্ক কৰি দিছিল যদিও তেওঁ কোনো ভ্ৰূক্ষেপ কৰা নাছিল৷ অৱশেষত শুক্ৰবাৰে স্থানীয় একাংশ মহিলাই অতৰ্কিতে অভিযান চলাই অসংযত অৱস্থাত উদ্ধাৰ কৰে দুগৰাকী দেহ ব্যৱসায়ী মহিলাক৷ আনহাতে ঝাৰগাঁও চিধাগুৰীৰ হেতুল আৰু ৰচিদুল নামৰ দুই যুৱকক আটক কৰি চমজাই দিয়ে আৰক্ষীক৷ 

ঘটনাস্থলীৰ পৰা পলায়ন কৰা পালিগুৰিৰ ৰুকমান আলী, ধানশালিৰ আজাৰুল সহ মুঠ তিনিজন যুৱকক পৰৱৰ্তী সময়ত পুনৰ আটক কৰি আৰক্ষীক চমজাই দিয়ে স্থানীয় লোকে৷ উজ্জলা সৰকাৰ নামৰ মহিলাগৰাকীৰ ঘৰৰ পৰা বহু আপত্তিজনক সামগ্ৰী উদ্ধাৰ কৰিবলৈ সক্ষম হয় আৰক্ষী৷ ইফালে যুৱক কেইজনে লৈ অহা এখন ব্ৰইলাৰ মুৰ্গী কঢ়িওৱা বাহনৰ লগতে জব্দ কৰে এখন মটৰচাইকেল আৰু কেইবাটাও মোবাইল ফোন৷ অতি শীঘ্ৰে এই নাৰী দেহ ব্যৱসায়ী চক্ৰটোৰ বিৰুদ্ধে আৰক্ষীয়ে কঠোৰ ব্যৱস্থা গ্ৰহণ নকৰিলে ৰাইজে ব্যৱস্থা ল’ব বুলিও সকিয়াই দিয়ে স্থানীয় লোকে৷