জেলৰ পৰা ওলাল ‘জুম্বী এঞ্জেলিনা জলী’! কিন্তু কোন এই ‘জুম্বী এঞ্জেলিনা’, কিয় বিহা হৈছিল কাৰাদণ্ড?

ডিজিটেল ডেস্কঃ কাৰাগাৰৰ পৰা মুক্ত হ’ল ‘জুম্বী এঞ্জেলিনা জলী’। নাম তেওঁৰ চাহাৰ তাবাৰ। ইৰাণৰ এই যুৱতীগৰাকীয়ে বোৰ্খা পৰিধান নকৰাকৈ ইনষ্টাগ্ৰামত ফটো শ্বেয়াৰ কৰাৰ বাবে ২০১৯ চনত গ্ৰেপ্তাৰ কৰা হৈছিল।

২১ বৰ্ষীয় যুৱতীগৰাকীয়ে ইনষ্টাগ্ৰামত হলিউডৰ বিখ্যাত অভিনেত্ৰী এঞ্জেলিনা জলীৰ মুখৰ গঠনৰ আৰ্হিত কেইবাখনো বিকৃত তথা জুম্বীসদৃশ ফটো শ্বেয়াৰ কৰিছিল। তাৰ পাছতে তেওঁ বিশ্বজুৰি জনপ্ৰিয়তা অৰ্জন কৰে। সকলোৱে তেওঁক ‘জু্ম্বী এঞ্জেলিনা জলী’ নাম দিয়ে।

কিন্তু ২০১৯ চনৰ ১৯ অক্টোবৰত ইৰাণৰ আৰক্ষীয়ে তেওঁক গ্ৰেপ্তাৰ কৰে। তেওঁৰ ওপৰত দুৰ্নীতি আৰু ধৰ্মবিৰোধিতাৰ অভিযোগ তোলা হয় আৰু ১০ বছৰৰ কাৰাদণ্ড বিহে।

কিন্তু ইৰাণত শেহতীয়াকৈ হোৱা হিজাব বিৰোধী আন্দোলনৰ ফলশ্ৰুতিত ১৪ মাহৰ অন্তত তেওঁক মুকলি কৰা হয়। এইক্ষেত্ৰত ইৰাণৰ হিজাব বিৰোধী আন্দোলনৰ কৰ্মী মাছিহ আলিনেজাদকে ধৰি কেইবাগৰাকীও নেত্ৰীয়ে চাহাৰৰ সমৰ্থনত থিয় হয়।

কাৰাগাৰৰ পৰা উলায়েই চাহাৰে কেমেৰাৰ আগত নিজৰ মুখখন প্ৰদৰ্শন কৰিছে। ইনষ্টাগ্ৰামত শ্বেয়াৰ কৰা ফটোসমূহৰ বিষয়ে কয় যে তেওঁ বিভিন্ন মেক আপ আৰু ফটোশ্বপৰ দ্বাৰা তেওঁ এই অদ্ভূত চেহেৰা লাভ কৰিছিল।

আনহাতে, চাহাৰ তাবাৰৰ প্ৰকৃত নাম ফাটিমেহ খিছৱান্দ। সাংবাদিকক তেওঁ কয় যে অদ্ভূত মেকঅভাৰৰ জড়িয়তে তেওঁ বিশ্বজুৰি জনপ্ৰিয়তা অৰ্জন কৰিবলৈ লক্ষ্য বান্ধি গৈছিল। ফটোসমূহ তেওঁ ধেমালিৰ বাবেই প’ষ্ট কৰিছিল বুলি জনায়।