ঝাৰখণ্ডত আস্থাভোটত বিজয়ী চম্পাই ছোৰেন, ৪৭ জন বিধায়কে দিলে সপক্ষে ভোট

 চম্পাই ছোৰেনে  ৪৭ জন বিধায়কৰ সমৰ্থন লাভ কৰিবলৈ সক্ষম হয়। ২৯ জন বিধায়কে মুখ্যমন্ত্ৰী আস্থাভোটত চম্পাই ছোৰেনৰ  বিৰোধিতা কৰে। কিন্তু সমৰ্থন কৰা বিধায়কৰ সংখ্যা বেছি হোৱাত চম্পাই ছোৰেন মুখ্যমন্ত্ৰীৰ পদত বাহাল থকাটো নিশ্চিত হৈ পৰে। উল্লেখ্য চম্পাই ছোৰেনে  শুক্ৰবাৰে মুখ্যমন্ত্ৰী হিচাপে শপতগ্ৰহণ কৰিছিল। ঝাৰখণ্ডৰ তদানীন্তন মুখ্যমন্ত্ৰী হেমন্ত সোৰেনক ৩১ জানুৱাৰীত ইডিয়ে গ্ৰেপ্তাৰ কৰিছিল। ইয়াৰ পূৰ্বে তেওঁ মুখ্যমন্ত্ৰীৰ পদৰ পৰা পদত্যাগ কৰিছিল। তাৰ পিছতে ঝাৰখণ্ডৰ ৰাজনীতিত অস্থিৰতা আৰম্ভ হয়। কংগ্ৰেছ, আৰজেডি আৰু অন্যান্য সহযোগী দলৰ সন্মতিত চম্পাই ছোৰেনক মুখ্যমন্ত্ৰী হিচাপে বাছনি কৰা হৈছিল। 

হেমন্তৰ পদত্যাগৰ ৩৬ ঘণ্টা পিছত চম্পাই ছোৰেনে  মুখ্যমন্ত্ৰী হিচাপে শপত গ্ৰহণ কৰিছিল।কিন্তু শপত লোৱাৰ পাছতো শংকাৰ  ডাৱৰ আঁতৰি যোৱা নাছিল। মিত্ৰজোঁটৰ বিধায়কসকলক  হৰ্ছ ট্ৰেডিঙৰ পৰা ৰক্ষা কৰিবলৈ কংগ্ৰেছ শাসিত তেলেংগানালৈ প্ৰেৰণ কৰা হৈছিল। উল্লেখ্য ভূমি কেলেংকাৰীৰ  গোচৰৰ সন্দৰ্ভত বুধবাৰে নিশা ইডিয়ে হেমন্ত ছোৰেনক  গ্ৰেপ্তাৰ কৰিছিল। পিছদিনা  হেমন্ত ছোৰেনে  জামিন বিচাৰি উচ্চতম ন্যায়ালয়ৰ কাষ চাপিছিল। ঝাৰখণ্ডৰ প্ৰাক্তন মুখ্যমন্ত্ৰীগৰাকীক  ৰাঁচীৰ এখন বিশেষ আদালতে এদিনৰ বাবে কাৰাগাৰলৈ প্ৰেৰণ কৰিছিল। শুক্ৰবাৰে পুৱা উচ্চতম ন্যায়ালয়ত হেমন্তৰ জামিন আবেদনৰ শুনানি আৰম্ভ হৈছিল। ভাৰতৰ মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত এখন বিচাৰপীঠে কৈছিল যে উচ্চতম ন্যায়ালয়ে  গোচৰটোৰ শুনানিৰ বিষয়ত  আগ্ৰহী নহয়।