ডিজিটেল ডেস্কঃ জম্মু-কাশ্মীৰত নিৰাপত্তাৰক্ষীৰ সৈতে হোৱা এক সংঘৰ্ষত নিহত হয় লস্কৰ-ঈ-তৈবা(LeT)ৰ এজন সন্ত্ৰাসবাদী। নিহত সন্ত্ৰাসবাদীজন কেইবাটাও হিংসাত্মক কাণ্ডত জড়িত আছিল। জম্মু-কাশ্মীৰৰ শ্বোপিয়ান জিলাত নিহত হয় সন্ত্ৰাসবাদীজন। নিহত সন্ত্ৰাসবাদীজনক বিলাল আহমেদ ভাট বুলি চিনাক্ত কৰা হৈছে।
জিলাখনৰ চোটিগাম গাঁৱত সন্ত্ৰাসবাদীজন থকা বুলি তথ্য লাভ কৰে আৰক্ষীয়ে। এই তথ্যৰ আধাৰত পুৱাৰ ভাগত নিৰাপত্তা বাহিনীয়ে তালাচী অভিযান আৰম্ভ কৰে।
নিৰাপত্তা বাহিনী আহিছে বুলি গম পাই লুকাই থকা সন্ত্ৰাসবাদীজনে তেওঁলোকৰ ওপৰত নিৰ্বিচাৰ গুলীচালনা কৰে আৰু ইয়াৰ লগে লগে অভিযানকাৰী দলটোৱেও গুলীবৰ্ষণ কৰে।
এই এনকাউণ্টাৰত সন্ত্ৰাসবাদীজন নিহত হয়। এনকাউণ্টাৰৰ স্থানৰ পৰা এ কে ছিৰিজৰ ৰাইফলকে ধৰি আন বহু অস্ত্ৰ-শস্ত্ৰ, গোলাবাৰুদ আৰু তিনিটা মেগজিন উদ্ধাৰ কৰা হৈছে বুলি এগৰাকী আৰক্ষী বিষয়াই সদৰী কৰে।
হত্যাকে ধৰি কেইবাটাও সন্ত্ৰাসবাদী অপৰাধৰ গোচৰত জড়িত আছিল সন্ত্ৰাসবাদীজন। তেওঁ যুৱক-যুৱতীক সন্ত্ৰাসবাদী সংগঠনত যোগদান কৰিবলৈ উচটনি দিয়াৰ লগতে ১২ জন স্থানীয় যুৱকক প্ৰৰোচিত কৰি সন্ত্ৰাসবাদী সংগঠনত যোগ দিয়াইছিল।
Continue Reading
