ডিজিটেল ডেস্কঃ জম্মু-কাশ্মীৰৰ কুপৱাৰা জিলাত নিয়ন্ত্ৰণ ৰেখাৰ ওচৰত আজি পুনৰ সন্ত্ৰাসবাদীৰ সৈতে সংঘৰ্ষত লিপ্ত হয় ভাৰতৰ নিৰাপত্তা বাহিনী। নিয়ন্ত্ৰণ ৰেখাৰে অনুপ্ৰৱেশৰ চেষ্টা চলাওঁতেই সেনাৰ গুলীত নিহত হয় দুই সন্ত্ৰাসবাদী সদস্য।
কুপৱাৰা জিলাৰ মচিল ছেক্টৰত সংঘটিত হৈছে এই ঘটনা। কাশ্মীৰ মণ্ডল আৰক্ষীয়ে এক টুইট যোগে সদৰী কৰিছে এই খবৰ। টুইটটোত উল্লেখ কৰা মতে, কুপোৱাৰা জিলাৰ দোবানাৰ মাছল অঞ্চলত সেনা আৰু কুপৱাৰা আৰক্ষীয়ে এই যৌথ অভিযান চলাইছিল।
সংঘৰ্ষস্থলীত অনুসন্ধান অব্যাহত আছে বুলি লগতে উল্লেখ কৰে কাশ্মীৰ মণ্ডল আৰক্ষীয়ে। অৱশ্যে নিহত সন্ত্ৰাসবাদী দুজন কোন গোটৰ সদস্য সেয়া এইপৰ্যন্ত প্ৰকাশ কৰা হোৱা নাই।
উল্লেখ্য যে, যোৱা মাহত সেনাই ভাৰতত অনুষ্ঠিত হোৱা জি-২০ শীৰ্ষ সন্মিলনত ব্যাঘাত জন্মোৱাৰ উদ্দেশ্যে ভাৰতত অনুপ্ৰৱেশৰ চেষ্টা চলোৱা পাকিস্তানৰ সমৰ্থিত সন্ত্ৰাসবাদীৰ এটা দলক বাধা দিয়া বুলি প্ৰকাশ কৰিছিল।
লক্ষণীয়ভাৱে, দেওবাৰে সেনাই পাকিস্তানৰ আন্তঃসেৱা চোৰাংচোৱা সংস্থা আৰু সন্ত্ৰাসবাদী সংগঠনে মহিলা আৰু নাবালকৰ জৰিয়তে অস্ত্ৰ-শস্ত্ৰ আৰু বাৰ্তা প্ৰেৰণৰ বিপজ্জনক পদক্ষেপ পোহৰলৈ আহিছে বুলি উল্লেখ কৰিছিল।
Continue Reading
