ডিজিটেল ডেস্কঃ কাশ্মীৰতো আৰম্ভ হ’ব বন্দে ভাৰত মেট্ৰ' ৰে’ল সেৱা।২০২৩ চনৰ ডিচেম্বৰৰ ভিতৰত বা ২০২৪ চনৰ জানুৱাৰী মাহৰ ভিতৰত উধমপুৰ-শ্ৰীনগৰ-বাৰামুলা ৰে'ল সংযোগ প্ৰকল্প (ইউএছবিআৰএল) সম্পূৰ্ণ হোৱাৰ পিছত ভাৰতীয় ৰে'লৱেই শীঘ্ৰেই জম্মু-শ্ৰীনগৰ পথত বন্দে ভাৰত এক্সপ্ৰেছ আৰম্ভ কৰাৰ পৰিকল্পনা কৰিছে। ৰে'ল মন্ত্ৰী অশ্বিনী বৈষ্ণৱে জম্মু-কাশ্মীৰ ভ্ৰমণৰ বিষয়ে নিশ্চিত কৰি এই কথা কয়।
অৰ্ধ-উচ্চ গতিৰ ৰে'লখন ইতিমধ্যে জম্মু-কাশ্মীৰৰ কাটৰা পথত দিল্লী-মাতা বৈষ্ণো দেৱীৰ মাজত চলি আছে। উধমপুৰ-বাৰামুলা ৰে'ল সংযোগৰ প্ৰকল্প সম্পূৰ্ণৰূপে কাৰ্যকৰী হোৱাৰ পিছত জম্মু আৰু শ্ৰীনগৰৰ মাজত বন্দে ভাৰত ৰে'লখন চলোৱা হ’ব বুলি ৰে’ল মন্ত্ৰীগৰাকীয়ে কয়।
উধমপুৰ-শ্ৰীনগৰ-বাৰামুলা ৰে'ল সংযোগ প্ৰকল্প হৈছে ভাৰতীয় ৰে'লৱেৰ দ্বাৰা নিৰ্মাণ কৰা এক গুৰুত্বপূৰ্ণ ৰে'লপথ। কাশ্মীৰ উপত্যকাক ভাৰতৰ বাকী অংশৰ সৈতে সংযোগ কৰাৰ উদ্দেশ্যে এই প্ৰকল্প গ্ৰহণ কৰা হৈছে। বৰ্তমান কাশ্মীৰ উপত্যকাত ১১৮ কিলোমিটাৰ দৈৰ্ঘ্যৰ বানিহাল-বাৰামুলা ৰে'লপথ কাৰ্যকৰী হৈ আছে।
কাশ্মীৰত বিশ্বৰ সৰ্বোচ্চ ৰে'লৱে দলং চেনাব দলং নিৰ্মাণ কৰা হৈছে। শেহতীয়াকৈ ৰে'ল মন্ত্ৰী অশ্বিনী বৈষ্ণৱে ৰে'ল বিভাগৰ বিষয়াসকলৰ সৈতে চেনাব নদীৰ ওপৰত নিৰ্মাণ কৰা বিশ্বৰ সৰ্বোচ্চ দলঙৰ ওপৰত ট্ৰেক-মাউণ্টেড ট্ৰলীৰে ভ্ৰমণ কৰিছে আৰু ৩৫৯ মিটাৰ উচ্চতাৰ দলংখন পৰিদৰ্শন কৰিছে।
কামৰ অগ্ৰগতি সন্দৰ্ভত তেওঁ কয় যে চেনাব দলঙৰ ট্ৰেকৰ কাম সম্পূৰ্ণ হৈছে আৰু এতিয়া বৈদ্যুতিক কাম হাতত লোৱা হ'ব। তেওঁ লগতে কয় যে কাশ্মীৰ উপত্যকাৰ বদগামত বন্দে ভাৰত এক্সপ্ৰেছ ৰে'ল মেৰামতিৰ সুবিধা স্থাপন কৰা হ'ব আৰু প্ৰথমবাৰৰ বাবে জম্মু আৰু শ্ৰীনগৰ চহৰৰ মাজত বন্দে ভাৰত মেট্ৰ' চলিব।
তেওঁ কয় "আমি আশা কৰি আছো যে ডিচেম্বৰ বা জানুৱাৰীলৈকে জম্মু-শ্ৰীনগৰৰ মাজত ৰে’ল সংযোগ সম্পূৰ্ণ হ'ব"।
Continue Reading
