জম্মু-শ্ৰীনগৰ ৰাষ্ট্ৰীয় ঘাইপথত খহিল সুৰংগ: তিনিজনক উদ্ধাৰ, এজন নিহত

ডিজিটেল ডেস্ক: জম্মু আৰু কাশ্মীৰৰ ৰামবান জিলাৰ মেকাৰকোট অঞ্চলৰ খোনিনাল্লাত খহি পৰিছে নিৰ্মীয়মান সুৰংগ৷ এই ঘটনাত কেইবাজনো লোক আবদ্ধ হৈ পৰাৰ আশংকা কৰা হৈছে৷ ঘটনাটোৰ পাছত বৰ্তমান অঞ্চলটোত পূৰ্ণগতিত চলিছে  উদ্ধাৰ অভিযান৷ ছয়ৰ পৰা সাতজন লোক আবদ্ধ হোৱাৰ আশংকা কৰা হৈছে, আনহাতে তিনিজন লোকক উদ্ধাৰ কৰা হৈছে। এইপৰ্যন্ত মৃত্যু হৈছে এজন লোকৰ৷

কেন্দ্ৰীয় মন্ত্ৰী জীতেন্দ্ৰ সিঙে টুইটাৰযোগে পৰিস্থিতিটোৰ বিষয়ে অধিক তথ্য শ্বেয়াৰ কৰিছে। তেওঁ কয় যে উদ্ধাৰ অভিযান পূৰ্ণগতিত চলি আছে। তেওঁ লগতে কয় যে অসামৰিক প্ৰশাসন আৰু আৰক্ষী কৰ্তৃপক্ষই পৰিস্থিতিটো নিৰীক্ষণ কৰি আছে৷ বিষয়াসকলৰ মতে, বৃহস্পতিবাৰে নিশা অডিটৰ সময়ত খোনিনাল্লাত সুৰংগটোৰ সন্মুখৰ ফালৰ এটা সৰু অংশ খহি পৰে আৰু লগতে আৰক্ষী আৰু সেনাৰ দ্বাৰা তৎক্ষণাৎ এক যুটীয়া উদ্ধাৰ অভিযান আৰম্ভ কৰা হয় বুলি বিষয়াসকলে জানিবলৈ দিয়ে৷

ৰামবানৰ জিলা উপায়ুক্তই কয়,  মেকাৰকোট অঞ্চলৰ জম্মু-শ্ৰীনগৰ ৰাষ্ট্ৰীয় ঘাইপথৰ খোনিনাল্লাত এটা নিৰ্মীয়মান সুৰংগৰ এটা অংশ খহি পৰে। তেওঁ ৬ৰ পৰা ৭জন লোক আবদ্ধহৈ থকাৰ আশংকা কৰিছে৷ লগতে, এজনক উদ্ধাৰ কৰা হৈছে বুলি জানিবলৈ দিয়ে৷ সম্প্ৰতি, চলিত উদ্ধাৰ অভিযানৰ বাবে জম্মু-শ্ৰীনগৰ ৰাষ্ট্ৰীয় ঘাইপথ সাময়িকভাৱে বন্ধ কৰি দিয়া হৈছে।