ডিজিটেল ডেস্কঃ কাৰ্গিল যুদ্ধৰ নায়ক বীৰ চক্ৰ বঁটা লাভ কৰা চুবেদাৰ মেজৰ চেৱাং মুৰোপৰ যোৱা নিশা লেহৰ সমীপত সংঘটিত এটি ভয়ানক পথ দুৰ্ঘটনাত শ্বহীদ হয়। আজি এই তথ্য প্ৰদান কৰে সেনা বিষয়াসকলে। কাৰ্গিল যুদ্ধৰ নায়কৰ মৃত্যুত শোক প্ৰকাশ কৰিছে ফায়াৰ এণ্ড ফিউৰি কৰ্পছৰ কমাণ্ডাৰ লেফটেনেণ্ট জেনেৰেল ৰছিম বালিয়ে।
লেফটেনেণ্ট জেনেৰেল ৰছিম বালিয়ে সুবেদাৰ মেজৰৰ ঘৰলৈ গৈ ভাৰতীয় সেনাৰ হৈ শোক প্ৰকাশ কৰে। শ্বহীদ হোৱা সেনা জোৱান চেৱাং মুৰোপৰ পিতৃ নাইব চুবেদাৰ চেৰিং মুটোপকে ধৰি সমগ্ৰ পৰিয়ালটোক লগ কৰি লেফটেনেণ্ট জেনেৰেল ৰছিম বালিয়ে শোকসন্তপ্ত পৰিয়ালটাক সমবেদনা জ্ঞাপন কৰে৷
ফায়াৰ এণ্ড ফিউৰি কৰ্পছৰ অফিচিয়েল টুইটাৰ একাউণ্টে টুইট কৰি কয় যে বীৰ চক্ৰ বঁটা বিজয়ী বাহাদুৰ চুবেদাৰ মেজৰ চেৱাং মৰুপৰ দুখজনক মৃত্যুৰ বাবে ফায়াৰ এণ্ড ফিউৰি কৰ্পছে গভীৰভাৱে দুখ প্ৰকাশ কৰিছে। ইফালে, ছ’চিয়েল মিডিয়াত চুবেদাৰ মেজৰ চেৱাং মুৰোপেক শ্ৰদ্ধাঞ্জলি জনাইছে সেৱা আগবঢ়োৱা আৰু প্ৰাক্তন সেনা জোৱানসকলে।
উল্লেখযোগ্য যে,১৯৯৯ চনৰ ৮ মে’ৰ পৰা ১৯৯৯ চনৰ ২৬ জুলাইৰ ভিতৰত পাকিস্তানী আক্ৰমণকাৰীৰ বিৰুদ্ধে কাৰ্গিল যুদ্ধ সংঘটিত হৈছিল। ১৯৯৮ চনৰ শীতকালত তেওঁলোকে নিয়ন্ত্ৰণ ৰেখা (LoC) পাৰ হৈ ভাৰতৰ ভূখণ্ডত প্ৰৱেশ কৰি কেইবাটাও পদ দখল কৰে।
যুদ্ধৰ সময়ত ভাৰতীয় সেনাই "অপাৰেচন বিজয়"ৰ অংশ হিচাপে পাকিস্তানী অনুপ্ৰৱেশকাৰীক খেদি পঠিয়াইছিল আৰু টাইগাৰ হিল তথা অন্যান্য ঠাইসমূহ পুনৰ দখল কৰাত সফল হৈছিল।
Continue Reading
