ডিজিটেল ডেস্ক: কাইলৈ পুনৰ বিবাহপাশত আবদ্ধ হ’ব পঞ্জাবৰ মুখ্যমন্ত্ৰী ভগৱন্ত মান৷ আম আদমী পাৰ্টিৰ পঞ্জাব গোটৰ মুখ্য মুখপাত্ৰই কয়, মান চাহেবে কুৰুক্ষেত্ৰৰ পেহোৱাৰ অন্তৰ্ভুক্ত ড° গুৰপ্ৰীত কৌৰৰ সৈতে বিবাহপাশত আৱদ্ধ হ’ব।
ভগৱন্ত মানৰ এই বিবাহ অনুষ্ঠানত উপস্থিত থাকিব আপৰ ৰাষ্ট্ৰীয় আহ্বায়ক তথা দিল্লীৰ মুখ্যমন্ত্ৰী অৰবিন্দ কেজৰিৱাল আৰু তেওঁৰ পৰিয়াল৷ ২০১৫ চনত তেওঁৰ প্ৰথম পত্নী ইন্দ্ৰপ্ৰীত কৌৰৰ পৰা পৃথক হোৱাৰ পিছত এয়া মানৰ দ্বিতীয় বিবাহ। তেওঁৰ প্ৰথমা পত্নীৰ পৰা কন্যা সীৰত কৌৰ মান (২১) আৰু পুত্ৰ দিলশান মান (১৭) নামৰ দুটা সন্তান আছে। তেওঁলোকে এই বছৰৰ মাৰ্চ মাহত মানৰ শপত গ্ৰহণ অনুষ্ঠানত অংশগ্ৰহণ কৰিবলৈ আমেৰিকাৰ পৰা আহিছিল।
কেবিনেট মন্ত্ৰী হৰজ্যোট সিং বেইন্সে টুইটাৰযোগে মুখ্যমন্ত্ৰীক অভিনন্দন জনাইছে। টুইটযোগে তেওঁ লিখিছে, মোৰ মুখ্যমন্ত্ৰী ভগৱন্ত মানজীক আগন্তুক বিবাহিত জীৱনৰ শুভেচ্ছা জনাইছোঁ। মই তেওঁলোক দুয়োৰে জীৱনজোৰা মৰম, সন্মান আৰু সহযোগিতা কামনা কৰিছোঁ৷
পঞ্জাৱ কংগ্ৰেছৰ মুৰব্বী অমৰিন্দৰ সিং ৰাজা ৱাৰিঙেও টুইট কৰি কয়, মুখ্যমন্ত্ৰী ভগৱন্ত মানজীক মোৰ আন্তৰিক অভিনন্দন, যিহেতু তেওঁ কাইলৈ তেওঁৰ জীৱনৰ এটা নতুন অধ্যায় আৰম্ভ কৰিছে। আগন্তুক সুখী আৰু আনন্দময় বিবাহিত জীৱনৰ বাবে শুভকামনা।
৪৮ বছৰীয়া মানে ডাঃ গুৰপ্ৰীত কৌৰৰ সৈতে বিবাহপাশত আবদ্ধ হ’ব বুলি জানিব পৰা গৈছে৷ বিয়াখনত কেৱল পৰিয়াল আৰু নিকট আত্মীয় উপস্থিত থাকিব।
মুখ্যমন্ত্ৰীৰ পত্নী হ’বলৈ আগবঢ়া কোন এইগৰাকী গুৰপ্ৰীত কৌৰ?
গুৰপ্ৰীত কৌৰৰ বয়স ৩২ বছৰ। কৌৰৰ পৰিয়াল কুৰুক্ষেত্ৰৰ পেহৱা
এলেকা বাসিন্দা৷ তেওঁৰ পিতৃ ইন্দ্ৰজিৎ সিং এজন কৃষক, মাতৃ মাতা ৰাজ কৌৰ এগৰাকী গৃহিণী৷ তেওঁৰ দুগৰাকী
ভগ্নী আছে, যি বিদেশত থাকে। মানৰ
ঘনিষ্ঠ সূত্ৰই কৈছিল যে তেওঁলোকৰ পৰিয়াল দুটা বহুবছৰ ধৰি জড়িত হৈ আছে।
তেওঁৰ খুৰাক গুৰিন্দৰ জিতে কয় যে গুৰপ্ৰীত সদায় পঢ়া-শুনাত
ভাল আছিল। তেওঁ মুল্লানা চিকিৎসা মহাবিদ্যালয়ত পঢ়িছিল, য’ত তেওঁ স্বৰ্ণপদক
লাভ কৰিছিল৷ সূত্ৰসমূহে কয় যে, কৌৰে পঞ্জাব বিধানসভা নিৰ্বাচনৰ প্ৰচাৰৰ সময়ত ভগৱন্ত মানক সহায়ো
কৰিছিল গুৰপ্ৰীত কৌৰে৷
