ডিজিটেল ডেস্কঃ ৰিয়ান পৰাগ,অসম ক্ৰিকেটৰ অন্যতম এটি উজ্জ্বল নক্ষত্ৰ৷বৰ্তমান এইজন ৰিয়ানৰ ওপৰতেই দৃষ্টি নিবদ্ধ হৈ আছে৷কাইলৈ অৰ্থাৎ ৮ এপ্ৰিলত গুৱাহাটীৰ বৰ্ষাপাৰা ষ্টেডিয়ামত অনুষ্ঠিত হ’বলগীয়া ৰাজস্থান ৰয়েলছ আৰু দিল্লী কেপিটেলছৰ খেলখনত দেখা পোৱা যাব ৰিয়ানক৷
পূৰ্ব অসম ক্ৰিকেটাৰ পৰাগ দাস আৰু প্ৰাক্তন সাতোঁৰবিদ মিঠু বৰুৱাৰ সন্তান ৰিয়ান পৰাগ৷ৰিয়ান পৰাগৰ নামত ইতিমধ্যে আছে IPL ইতিহাসৰ সৰ্বকণিষ্ঠ খেলুৱৈ হিচাপে কৰা অৰ্ধশতকৰ ৰেকৰ্ড৷১৭বছৰ ১৭৫দিনত এই ৰেকৰ্ডৰ অভিলেখ আছে ৰিয়ানৰ নামত৷
যোৱা ৫ এপ্ৰিল তাৰিখে পোনপ্ৰথমবাৰৰ বাবে অসমত অনুষ্ঠিত হোৱা আইপিএল মেচত খেল প্ৰদৰ্শন কৰিলে অসম সন্তান ৰিয়ান পৰাগে৷গুৱাহাটীৰ বৰ্ষাপাৰা ষ্টেডিয়ামত অনুষ্ঠিত হোৱা পঞ্জাব কিংছ আৰু ৰাজস্থান ৰয়েলছৰ হাইভল্টেজ মেচখনত বেটিঙ কৌশল আৰু ফিল্ডিঙেৰে দৰ্শকৰ দৃষ্টি আকৰ্ষণ কৰে ৰিয়ান পৰাগে৷
খেলখনৰ আৰম্ভণিতে ৰাজস্থান ৰয়েলছে টছ জিকি বলিঙৰ সিদ্ধান্ত লয়,ফিল্ডিঙৰ জৰিয়তে ৰিয়ান পৰাগে পঞ্জাব কিংছৰ বেটছমেন জিতেশ শৰ্মাৰ কেচ ধৰে৷তাৰ পৰৱৰ্তী সময়ত ৰিয়ানে পঞ্জাব কিংছৰ অধিনায়ক শিখৰ ধাৱনৰ বেটৰ পৰা ওলোৱা এটা শক্তিশালী শ্ব’ট বচাবলৈ সক্ষম হয়৷
২০অভাৰত পঞ্জাব কিংছে ৰাজস্থান ৰয়েলছৰ সন্মুখত ১৯৮ৰাণৰ লক্ষ্য বান্ধি দিয়ে৷
সেই লক্ষ্য অণুসৰণ কৰি বেটিঙৰ পাল পৰাত ৰিয়ান পৰাগে ৰাজস্থান ৰয়েলছৰ হৈ ১২টা বলত ২০ৰাণ সংগ্ৰহ কৰে য’ত ১টা ফ’ৰ আৰু ২টা ছিক্স সন্নিৱিষ্ট আছিল৷
উল্লেখযোগ্য যে,পঞ্জাব কিংছৰ ব’লাৰ নাথান এলিছৰ বলত ৰিয়ান পৰাগ অৱশেষত আউট হয়৷এটা বাউঞ্চাৰৰ প্ৰত্যুত্তৰ বেটেৰে দিবলৈ গৈ পঞ্জাব কিংছৰ ফিল্ডাৰ শ্বাহৰূখ খানৰ হাতত কেচ আউট হয়৷
৫ এপ্ৰিলৰ খেলখনত ৰিয়ানৰ প্ৰদৰ্শন সন্তোষজনক নাছিল যদিও ৮ এপ্ৰিলত ৰিয়ানৰ প্ৰদৰ্শন উন্নত হ’ব বুলি ক্ৰীড়াপ্ৰেমীসকল আশাবাদী৷
Continue Reading
