কাইলৈ কংগ্ৰেছৰ সভাপতি নিৰ্বাচন, কেনেদৰে আৰু কি প্ৰক্ৰিয়াৰে অনুষ্ঠিত হ’ব এই নিৰ্বাচন?

ডিজিটেল ডেস্কঃ সোমবাৰে কংগ্ৰেছৰ সভাপতি নিৰ্বাচন অনুষ্ঠিত হ’ব। এই লৈ দেশৰ ৰাজনীতিত ব্যাপক চৰ্চা অব্যাহত আছে। দলীয় অন্তঃকন্দলেৰে জৰ্জৰিত হৈ থকা দলটোৰ সভাপতি নিৰ্বাচনত প্ৰতিদ্বন্দী হিচাপে থিয় দিছে জ্যেষ্ঠ কংগ্ৰেছী মল্লিকাৰ্জুন খৰ্গে আৰু কেৰেলাৰ সাংসদ শশী থাৰুৰ।

কংগ্ৰেছৰ নিৰ্বাচনক কেন্দ্ৰ কৰি দেশজুৰি ব্যাপক প্ৰস্তুতি চলা গৈছে। সোমবাৰে দেশৰ বিভিন্ন ভোট কেন্দ্ৰত পুৱা ১০ বজাৰ পৰা ভোটগ্ৰহণ লোৱা হ’ব। প্ৰদেশ কংগ্ৰেছ কমিটিসমূহৰ ৯,০০০ ৰো অধিক কৰ্মীয়ে এই ভোটদান সাব্যষ্ট কৰিব।

কংগ্ৰেছৰ নিৰ্বাচনী বিভাগৰ চেয়াৰমেন মধুসূদন মিস্ত্ৰীয়ে সাংবাদিকক জনোৱামতে, ১০ বজাৰ পৰা আবেলি ৪ বজালৈকে এই ভোটগ্ৰহণ লোৱা হ’ব। মন পচন্দৰ প্ৰাৰ্থীজনক ‘টিক’ চিহ্ন দি ভোটদান কৰিব লাগিব।

ভোটগ্ৰহণ সমাপ্ত হোৱাৰ পাছত ১৮ অক্টোবৰ তাৰিখে বেলট বাকচ সমূহ দিল্লীস্থিত দলৰ মুখ্য কাৰ্যালয়লৈ নিয়া হ’ব। ১৯ অক্টোবৰত এইসমূহ গণনা কৰা হ’ব। সমগ্ৰ নিৰ্বাচনী প্ৰক্ৰিয়াটো নিকা আৰু মুক্তভাৱে সম্পন্ন হ’ব বুলি মিস্ত্ৰীয়ে আশা প্ৰকাশ কৰিছে।

উল্লেখ্য যে যোৱা ২৪ বছৰৰ মূৰত প্ৰথমবাৰৰ বাবে দেশৰ আটাইতকৈ পুৰণা দলটোৱে গান্ধী পৰিয়ালৰ বাহিৰৰ এজন নেতাক সভাপতি হিচাপে নিৰ্বাচিত কৰিব। কংগ্ৰেছৰ ভাৰপ্ৰাপ্ত সভানেত্ৰী ছোনিয়া গান্ধী, সহঃ সম্পাদক প্ৰিয়ংকা গান্ধী ভাদ্ৰা আৰু প্ৰাক্তন প্ৰধানমন্ত্ৰী মনমোহন সিঙেও ভোটদান কৰিব। তেওঁলোকে দিল্লীস্থিত অল ইণ্ডিয়া কংগ্ৰেছ কমিটিৰ মুখ্য কাৰ্যালয়ত ভোটদান কৰিব। আনহাতে, ‘ভাৰত জুড়ো যাত্ৰা’ত বৰ্তমান ব্যস্ত থকা ৰাহুল গান্ধীয়ে কাইলৈ যি স্থানত থাকিব, তাতে ভোটদান কৰিব।