ডিজিটেল ডেস্ক: ক্ৰমাৎ ভয়ংকৰ ৰূপ ধাৰণ কৰিছে কালঘূৰ্ণী ‘মোচা’ই৷ প্ৰতিঘণ্টাত ১৭৫ কিঃমিঃ বেগত ধুমুহাৰ আশংকা কৰা হৈছে৷ পশ্চিমবংগত হাই এলাৰ্ট জাৰি কৰিছে প্ৰশাসনে৷ অন্ধ্ৰপ্ৰদেশ, ওড়িশাতো মোচাক লৈ শংকিত হৈ পৰিছে জনতা৷
উত্তৰ-পূৰ্বাঞ্চলৰ কিছু ৰাজ্যতো দেখা গৈছে ‘মোচা’ৰ প্ৰভাৱ। উত্তৰ-পূৰ্বাঞ্চলৰ লগতে অসমৰ কিছু কিছু ঠাইত পৰিছে বে’ অব্ বেংগল সাগৰ পৃষ্ঠত ঘণ্টাত ১৫০/১৬০ কি:মি: গতিবেগত উৎপত্তি হোৱা ঘূৰ্ণী বতাহৰ প্ৰভাৱ। আগন্তুক ৫ দিনলৈ বৰঝাৰস্থিত আঞ্চলিক বতৰ বিজ্ঞান কেন্দ্ৰই হালধীয়া আৰু কমলা ৰঙৰ সতৰ্কবাণী জাৰি কৰে।
বতৰ বিজ্ঞানৰ বতৰ বিজ্ঞানীৰ আগজাননী অনুসৰি অহা ২৪ ঘন্টাৰ ভিতৰত অসমৰ লগতে উত্তৰ-পূৰ্বাঞ্চলৰ ৰাজ্যৰ কিছু ঠাইত পাতলীয়া বৰষুণৰ লগত বিজুলী ঢেৰেকনি অহাৰ সম্ভাৱনা আছে৷ ১৩ মে’ত নগালেণ্ড মণিপুৰ, মিজোৰাম আৰু ত্ৰিপুৰাৰ কিছু ঠাইত ধাৰাসাৰ বৰষুণ আহিব যদিও অসম, মেঘালয় আৰু অৰুণাচল প্ৰদেশৰ কিছু ঠাইত পাতলীয়া বৰষুণ আহিব পাৰে।
ঠিক তেনেদৰে ১৪ মে’ত ‘মোচা’ ঘূৰ্ণী বতাহৰ ফলত মণিপুৰ মিজোৰাম আৰু ত্ৰিপুৰাৰ কিছু অঞ্চলত ৫০/৬০ কি:মি: গতিবেগত ধুমুহাৰ লগতে প্ৰবল বৃষ্টিপাত হোৱাৰ সম্ভাৱনা যদিও অসম, মেঘালয়, নগালেণ্ড আৰু অৰুণাচলৰ কিছু ঠাইত আহিব পাৰে ধাৰাসাৰ বৰষুণ। ১৫ মে’ত অসম, মেঘালয়ৰ লগতে উত্তৰ-পূৰ্বাঞ্চলৰ ৰাজ্যসমূহৰ কিছু ঠাইত পুনৰ ধাৰাসাৰ বৰষুণৰ আগজাননী সদৰী কৰে বৰঝাৰস্থিত আঞ্চলিক বতৰ বিজ্ঞান কেন্দ্ৰৰ বতৰ বিজ্ঞানীয়ে।ঠিক তেনেদৰে অহা ১৬ মে’ত অসম আৰু মেঘালয়ৰ কিছু ঠাইত প্ৰবল বৃষ্টিপাত হোৱাৰ উপৰি উত্তৰ-পূৰ্বাঞ্চলৰ ৰাজ্যসমূহৰ ঠাইবিশেষে ধাৰাসাৰ বৰষুণ অহাৰ যথেষ্ট সম্ভাৱনা আছে৷
Continue Reading
