ডিজিটেল ডেস্কঃ পাকিস্তানী সন্ত্ৰাসবাদীয়ে অশান্ত কৰি ৰখা কাশ্মীৰত শুকুৰবাৰে সুৰক্ষা বাহিনীয়ে উপত্যকাটোৰ কুপৱাৰা জিলাৰ নিয়ন্ত্ৰণ ৰেখাৰ (এলঅ'চি) ওচৰত পাঁচজন সন্ত্ৰাসবাদীক হত্যা কৰে ৷ সেনাই প্ৰকাশ কৰা মতে ২০২১ চনৰ পিছত এয়াই "আটাইতকৈ ডাঙৰ" অনুপ্ৰৱেশৰ প্ৰচেষ্টা আছিল৷
জম্মু আৰু কাশ্মীৰ আৰক্ষীয়ে লাভ কৰা চোৰাংচোৱা তথ্যৰ ওপৰত ভিত্তি কৰি বৃহস্পতিবাৰে নিশা কেৰান খণ্ডৰ জুমাগুণ্ড অঞ্চলত অভিযান আৰম্ভ কৰা হৈছিল।অভিযান সন্দৰ্ভত সেনাৰ ২৮ ডিভিজনৰ বিষয়া মেজৰ জেনেৰেল গিৰীশ কালিয়াই কয় যে চোৰাংচোৱাৰ তথ্যৰ আধাৰত অনুপ্ৰৱেশৰ চেষ্টা বিফল কৰিবলৈ অভিযান আৰম্ভ কৰা হৈছিল৷
এই অভিযানৰ সময়তে নিৰাপত্তা বাহিনীৰ গুলীত পাঁচ জন সন্ত্ৰাসবাদী নিহত হয়৷ তেওঁ কয় যে সন্ত্ৰাসবাদীসকল যথেষ্ট পৰিমাণে সশস্ত্ৰ হৈ আহিছিল৷ তেওঁলোক খুব ভালদৰে প্ৰশিক্ষিত আছিল বুলিও ধাৰণা কৰা হৈছে৷
অভিযানৰ সময়ত নিৰাপত্তা বাহিনীয়ে নিহত সন্ত্ৰাসবাদী কেইজনৰ পৰা পাঁচটা এ কে চিৰিজৰ ৰাইফল, ১৫ টা মেগজিন আৰু গ্ৰেনেড , নাইট ভিজন ডিভাইচ , বাইনোকুলাৰৰ উদ্ধাৰ কৰে৷
