ডিজিটেল ডেস্কঃ জম্মু আৰু কাশ্মীৰৰ লেফটেনেণ্ট গভৰ্ণৰ মনোজ সিনহাই শ্ৰীনগৰৰ ডাউনটাউন অঞ্চলত পুনৰ নিৰ্মাণ কৰি উলিওৱা পুৰণি হাব্বা কাদাল দলং উদ্বোধন কৰে। তেওঁ ঝিলাম ৰিভাৰফ্ৰণ্ট ফেজ-২ৰ আধাৰশিলাও স্থাপন কৰে। এয়া কাশ্মীৰৰ পৰ্যটনৰ প্ৰচাৰৰ বাবে এক বিশেষ পদক্ষেপ হিচাবে পৰিগণিত হৈছে৷ বিশেষকৈ ডাউন টাউনৰ দৰে ঐতিহ্যবাহী স্থানত এনে পৰ্যটনক্ষেত্ৰৰ নিৰ্মাণে সেই ঠাইলৈ বহু পৰ্যটকক আকৰ্ষণ কৰিব বুলি ধাৰণা কৰা হৈছে৷
উল্লেখ্য সেই ঠাইত কিছু বছৰৰ আগলৈকে বন্দুকৰ শব্দত ৰাতি পুৱাইছিল৷ এসময়ত সেই ঠাইডোখৰ বিচ্ছিন্নতাবাদীৰ ঘাটি আছিল৷ নিৰাপত্তাবাহিনীলৈ শিল-নিক্ষেপৰ ঘটনাৰ কেন্দ্ৰবিন্দু আছিল ডাউন টাউন এলেকা। কিন্তু এতিয়া তাত সন্ত্ৰাসবাদ নাই৷ চৌপাশে শান্তি বিৰাজ কৰা ডাউন টাউনত সেয়ে বিকশিত হৈছে পৰ্যটনৰ ন ন ক্ষেত্ৰ৷ কাশ্মীৰৰ চৰকাৰে শ্ৰীনগৰ চহৰৰ ঐতিহ্যভৱন আৰু অন্যান্য পৰ্যটকৰ আকৰ্ষণৰ স্থানসমূহ পুনৰুজ্জীৱিত কৰি আছে ৷ সেই স্থানসমূহত যুৱসকলৰ বাবে নিযুক্তিৰো সুযোগ সৃষ্টি হৈছে।
বিশেষকৈ জম্মু কাশ্মীৰ লিবাৰেচন ফ্ৰণ্ট (জেকেএলএফ) আৰু আল-উমাৰ সন্ত্ৰাসবাদী সংগঠন দুটাই হাব্বা কাদাল এলেকাক অশান্ত কৰি ৰাখিছিল৷ ব্যৱসায়ী সতীশ তিকুক ১৯৯০ চনৰ ২ ফেব্ৰুৱাৰীত জেকেএলএফৰ সন্ত্ৰাসবাদী বিট্টা কাৰাটেই শ্ৰীনগৰৰ হাব্বা কাদাল অঞ্চলৰ কাৰফালি অঞ্চলত থকা তেওঁৰ বাসগৃহৰ বাহিৰত গুলীয়াই হত্যা কৰিছিল৷
আন বহু কেইজন লোককো সেই এলেকাত সন্ত্ৰাসবাদীয়ে হত্যা কৰিছিল৷ কিন্তু এতিয়া সেই ঠাইত সন্ত্ৰাসবাদৰ কোনো চিন-মোকাম নাই৷ কাশ্মীৰৰ পৰা সংবিধানৰ ৩৭০ অনুচ্ছেদ প্ৰত্যাহাৰ কৰাৰ পিছতে উপত্যকাটোলৈ এতিয়া শান্তি ঘূৰি আহিছে৷ ফলত সন্ত্ৰাসবাদৰ ঘাটি সেই এলেকা এতিয়া পৰ্যটকৰ বাবে হৈ পৰিছে ছেলফি পইণ্ট৷
Continue Reading
