কাশ্মীৰত পুনৰ আৰম্ভ হ’ল ভাৰত জোড়ো যাত্ৰা : ৰাহুল গান্ধীৰ সৈতে যোগদান কৰিলে মেহবুবা মুফটিয়ে

ইফালে, জম্মু-কাশ্মীৰত ভাৰত জোড়ো যাত্ৰাৰ বাবে পৰ্যাপ্ত নিৰাপত্তা নিশ্চিত কৰাৰ ক্ষেত্ৰত হস্তক্ষেপ বিচাৰি কংগ্ৰেছ সভাপতি মল্লিকাৰ্জুন খাৰ্গেই গৃহমন্ত্ৰী অমিত শ্বাহলৈ এখন পত্ৰ লিখিছে। শ্বাহলৈ লিখা পত্ৰখন কংগ্ৰেছে অভিযোগ কৰিছে যে কাজিগুণ্ডত পদযাত্ৰাৰ সময়ত জনসমাগম বৃদ্ধি হোৱাৰ সময়তে  জম্মু-কাশ্মীৰ আৰক্ষীয়ে  ৰাহুল গান্ধীৰ চাৰিওফালে থকা নিৰাপত্তা প্ৰত্যাহাৰ কৰিছিল।খাৰ্গেই পত্ৰ খনত লিখিছে " আপুনি পাৰিলে  ব্যক্তিগতভাৱে এই ক্ষেত্ৰত হস্তক্ষেপ কৰক আৰু সংশ্লিষ্ট বিষয়াসকলক যাত্ৰাৰ সমাপ্তি হোৱালৈ আৰু ৩০ জানুৱাৰীত শ্ৰীনগৰত অনুষ্ঠিত অনুষ্ঠান পৰ্যন্ত পৰ্যাপ্ত নিৰাপত্তা প্ৰদান কৰিবলৈ পৰামৰ্শ দিয়ক," । 

খাৰ্গেই সাংবাদিকক কয় "আমি আশা কৰিছো যে অহা দুদিনৰ ভিতৰত যাত্ৰাত বহু লোকে  যোগদান কৰিব আৰু সোমবাৰে অনুষ্ঠিত হ'বলগীয়া অনুষ্ঠানটোতো বহু মানুহ হ’ব। কংগ্ৰেছৰ বহু জ্যেষ্ঠ নেতা আৰু অন্যান্য গুৰুত্বপূৰ্ণ ৰাজনৈতিক দলৰ নেতাসকলেও এই সামৰণি অনুষ্ঠানত অংশগ্ৰহণ কৰিব," । কংগ্ৰেছ নেতা ৰাহুল গান্ধীয়ে শনিবাৰে জম্মু-কাশ্মীৰৰ পুলৱামা জিলাত সংঘটিত গাড়ী বোমা বিস্ফোৰণত নিহত হোৱা ৪০ জন চিআৰপিএফ জোৱানৰ স্মৃতিত স্তম্ভত  পুষ্পাঞ্জলি অৰ্পন  কৰে৷  চাৰি বছৰ পূৰ্বে জম্মু-শ্ৰীনগৰ ৰাষ্ট্ৰীয় ঘাইপথৰ কাষত জৈশ-ই-মহম্মদৰ আত্মঘাতী বোমাৰুৱে চিআৰপিএফৰ বাছখন উৰুৱাই দিছিল। উল্লেখ্য ৰাহুল  গান্ধীৰ নেতৃত্বত পদযাত্ৰা যোৱা বছৰৰ ৭ ছেপ্টেম্বৰত কন্যাকুমাৰীৰ পৰা আৰম্ভ হৈছিল আৰু ই ৩০ জানুৱাৰীত শ্ৰীনগৰত সমাপ্ত হ'ব৷