ডিজিটেল ডেস্কঃ এমবাপেক লৈ বিশেষ ৰণকৌশলৰ পৰিকল্পনা কৰা নাই আৰ্জেণ্টিনাই। কাটাৰ বিশ্বকাপৰ ফাইনেলখনক এমবাপে আৰু মেছিৰ যুঁজ বুলি অভিহিত কৰা হৈছে। কিন্তু আৰ্জেণ্টিনাৰ প্ৰশিক্ষক লিঅ’নেল স্কাল’নিয়ে জনাইছে যে কিলিয়ান এমবাপেক বিশেষভাৱে পাত্তা দিয়া নাই তেওঁলোকে।
“ফ্ৰান্স দলটোৰ বিৰুদ্ধে আমি খেলিবলৈ নামিছো। কেৱল এমবাপেইতো সেই দলটোত নেখেলে। সেয়ে গোটেই দলটোৰ বিৰুদ্ধেই খেলিব লাগিব।”- স্কাল’নীয়ে কয়।
উল্লেখ্য যে আৰ্জেণ্টিনাৰ অন্যতম নিৰ্ভৰযোগ্য তাৰকা এঞ্জেল দি মাৰিয়াই এতিয়ালৈকে বিশ্বকাপৰ মেচসমূহত বিশেষ ভুমূকি মৰা নাই। আঘাটৰ বাবে তেওঁ আঁতৰি আছে। চৰ্চা চলিছে যে ফাইনেলখনত ডি মাৰিয়াই খেলিব। এই সম্পৰ্কেও মুখ খুলিছে স্কাল’নীয়ে।
“তেওঁ খেলিব। ক্ৰ’ৱেশ্চিয়াৰ বিৰুদ্ধেও খেলিব পাৰিলেহেঁতেন।”- স্কাল’নীয়ে জনায়।
আনহাতে, চেমিফাইনেলত বিজয়ী হোৱাৰ পাছতে আৰ্জেণ্টিনাৰ অধিনায়ক লিঅ’নেল মেছিয়ে কৈছিল যে এয়াই তেওঁৰ শেষ বিশ্বকাপ। এই বিষয়ে স্কালোনীয়ে কয় যে যদি ফাইনেলখনেই মেছিৰ শেষ মেচ হয়, তেন্তে মেছিয়ে যাতে বিদায়বেলাটো উপভোগ কৰিব পাৰে, সেই উদ্দেশ্য লৈয়েই দলটো খেলপথাৰত নামিব।
Continue Reading
