ডিজিটেল ডেস্কঃ বিশ্ব ফুটবলৰ ইতিহাসত আজি এটা উল্লেখযোগ্য দিন হিচাপে স্মৰণীয় হৈ ৰ’ব। এই স্মৰণীয় দিনটোৰ সাক্ষী হৈ ৰ’বলৈ আগবাঢ়িছো আমি। ক্ষন্তেক সময়ৰ পিছতে ভাগ্য নিৰ্ণয় হ’ব লিঅ’নেল মেছি। সেই লিঅ’নেল মেছিৰ, যাৰ ভৰিৰ যাদুত মুগ্ধ বিশ্ববাসী। বিশ্বৰ সৰ্বকালৰ শ্ৰেষ্ঠ ফুটবলাৰো আখ্যা দিয়া হয় আৰ্জেণ্টিনাৰ তাৰকাগৰাকীক।
কিন্তু এতিয়ালৈকে বিশ্বকাপ জয় কৰিব পৰা নাই মেছিয়ে। খেলিছে চাৰিখনকৈ বিশ্বকাপ, কিন্তু প্ৰতিবাৰেই নিৰাশ হ’বলগা হৈছে। ২০১৪ চনৰ বিশ্বকাপৰ ফাইনেলত উপনীত হৈছিল মেছিৰ দল আৰ্জেণ্টিনা। কিন্তু পৰাজীত হ’বলগা হৈছিল জাৰ্মানীৰ হাতত।
এইবাৰ মেছিৰ বিপক্ষে আছে ফ্ৰান্স। ২০১৮ চনৰ বিশ্বকাপজয়ী ফ্ৰান্সত আছে কিলিয়ান এমবাপে। মেছি আৰু এমবাপেৰ যুঁজ চলিছে বিশ্বকাপত। দুয়োজনেই কৰিছে পাঁচটাকৈ গ’ল। এমবাপেৰ খেলৰ ধৰণ দেখি বহুতে ক’ব বিচাৰে যে ২৩ বছৰীয়া যুৱকজনেই হৈছে মেছিৰ প্ৰকৃত উত্তৰাধিকাৰী।
মেছি আৰু এমবাপে- দুয়োজনেই বিশ্বকাপ কেৰিয়াৰৰ দ্বিতীয়খন ফাইনেল খেলিবলৈ নামিব। কিন্তু ৩৫ বছৰ বয়সীয়া মেছিৰ হাতত বিশ্বকাপ এতিয়ালৈকে নাই। অথচ ২৩ বছৰীয়া এমবাপেৰ হাতত আছে নিজৰ কেৰিয়াৰৰ প্ৰথমটো বিশ্বকাপ। অতিকৈ সফল এমবাপে। প্ৰথমখন বিশ্বকাপতে বিজয়ী হৈছিল এমবাপেৰ দল ফ্ৰান্স।
২০১৮ চনৰ বিশ্বকাপত দূৰ্দান্ত প্ৰদৰ্শন কৰিছিল এমবাপেই। কিন্তু ব্যৰ্থ হৈছিল মেছি। এইবাৰ দুয়োজনেই ক্লাচিক প্ৰদৰ্শন কৰি আছে। সেয়ে বিশ্বকাপৰ ফাইনেলখন তাৎপৰ্যপূৰ্ণ হৈ পৰিছে- কোন জয়ী হ’ব? মেছি নে এমবাপে? কিংম্বদন্তি নে কিংম্বদন্তিৰ উত্তৰাধিকাৰী?
Continue Reading
