ডিজিটেল ডেস্কঃ আঘাতৰ বাবে বিশ্বকাপৰ পৰা বাদ পৰিছে ফ্ৰান্সৰ নিৰ্ভৰযোগ্য ষ্ট্ৰাইকাৰ কৰিম বেনজিমা। কিন্তু শেহতীয়াকৈ চৰ্চা চলিছে যে আৰ্জেণ্টিনাৰ বিৰুদ্ধে দেওবাৰে ফাইনেলত নিজৰ দেশৰ হৈ অৱতীৰ্ণ হ’ব পাৰে তাৰকাগৰাকী।
চৰ্চা অনুসৰি, বেনজিমাই কাটাৰলৈ যোৱাটো নিশ্চিত। খেলপথাৰত নানামিলেও নিজৰ দেশৰ সমৰ্থনত ষ্টেডিয়ামত থাকিব বেনজিমা।
এই সম্পৰ্ক ফ্ৰান্সৰ প্ৰশিক্ষক দিদিয়েৰ ডুচঁক সাংবাদিকে সুধিছিল। কিন্তু উত্তৰ দিবলৈ নাৰাজ হ’ল প্ৰশিক্ষকগৰাকী।
উল্লেখ্য যে বিশ্বকাপ আৰম্ভ হোৱাৰ আগমুহূৰ্তত আঘাট লাভ কৰে বেনজিমাই। কিন্তু বিশ্বকাপত বেনজিমাৰ অভাৱ ফ্ৰান্সৰ বাবে সমস্যা হোৱা নাই। ফ্ৰান্সৰ ষ্ট্ৰাইকাৰ অলিভিয়েৰ জিৰ’ আৰু কিলিয়ান এমবাপে দূৰ্দান্ত ফৰ্মত আছে।
আনহাতে, বেনজিমাই শেহতীয়াকৈ ইনষ্টাগ্ৰামত লিখিছিল- “মই জীৱনত কাহানিও চেষ্টা এৰি দিয়া নাই। আজি ৰাতিও দলৰ কথা ভাবিব লাগিব, যিটো মই চিৰদিনেই কৰি গৈছে। বিবেকে কৈছে, মোৰ স্থানটো আন কাৰোবাক এৰি দিয়াই ভাল।”
তাৰকাগৰাকীৰ এই বক্তব্যই ব্যাপক কৌতূহলৰ সৃষ্টি কৰিছে। শীঘ্ৰেই আন্তৰ্জাতিক ফুটবলৰ পৰা অৱসৰ ল’ব নেকি বেলন ডি অ’ৰ বিজয়ী বেনজিমাই?
Continue Reading
