ডিজিটেল ডেস্কঃ কামৰ সন্ধানত বহিঃৰাজ্যলৈ যোৱাটো এটা সাধাৰণ কথা৷ কিন্তু বহিঃৰাজ্যলৈ কামৰ সন্ধানত গৈ নিশাটোৰ ভিতৰতে লাখ লাখ টকাৰ গৰাকী হোৱাটো নিশ্চয়কৈ আচৰিত কথা৷ কেৰালালৈ কাম কৰিবলৈ যোৱা এজন যুৱক শেহতীয়াকৈ লাখপতি হৈ পৰিছে৷
যুৱক জন হৈছে পশ্চিম বংগৰ শ্বেখ বাদেশ । বাদেশে কেৰালাত থকাৰ সময়তে এখন লটাৰীৰ টিকট কিনিছিল৷ তেনেকৈয়ে কপাল ফুলিল৷ লটাৰীত তেওঁ ৭৫ লাখ টকা জিকিছে৷ ইয়াৰ পিছতে নিৰাপত্তা বিচাৰি আৰক্ষীৰ কাষ চাপিছে যুৱকজনে। লটাৰীত ৭৫ লাখ টকা জিকাৰ পিছৰে পৰা বাদেশ আতংকত ভুগি আছে। যদি কোনোবাই টিকটটো কাঢ়ি লয় সেই আতংকই তেওঁক খেদি ফুৰিছে। সেয়েহে তেওঁ নিৰাপত্তা বিচাৰি আৰক্ষীৰ কাষ চাপিছে৷
উল্লেখ্য বাদেশে কেৰালাত শ্ৰমিক হিচাপে কাম কৰে। তেওঁ মুভাট্টুপুঝা আৰক্ষী থানা অঞ্চলত বাস কৰে। আৰক্ষী সূত্ৰই জনোৱা অনুসৰি তেওঁ এৰ্নাকুলামত এটা পথ নিৰ্মাণৰ কামত জড়িত থকাৰ সময়তে কেৰালা চৰকাৰৰ লটাৰীৰ টকট এখন কাটিছিল। সেই টিকট খনতেই ৭৫ লাখ টকা তেওঁ জিকিছে।
মুভাট্টুপুঝা আৰক্ষী থানাৰ ভাৰপ্ৰাপ্ত বিষয়া ৰাজেশ কে এন-এ কয়, "এজন লোকে আমাক ফোন কৰি আমাক কৈছিল যে তেওঁ ৭৫ লাখ টকাৰ লটাৰী জিকিছে। তেওঁ ভয় কৰিছে যে কোনোবাই লটাৰীৰ টিকটটো কাঢ়ি নিব পাৰে। গতিকে তেওঁ আমাৰ পৰা সুৰক্ষা বিচাৰিছে।’’ আৰক্ষীয়ে বাদেশক আশ্বাস দিছে যে তেওঁক সকলো ধৰণৰ সহায় কৰা হ’ব৷
Continue Reading
