ডিজিটেল ডেস্কঃএইবাৰ সংসদৰ মজিয়াত প্ৰধানমন্ত্ৰী নৰেন্দ্ৰ মোদীৰ বিৰুদ্ধে বিশেষাধিকাৰ ভংগৰ অভিযোগ উত্থাপন কৰিলে কংগ্ৰেছে। কংগ্ৰেছৰ ৰাজ্যসভাৰ সাংসদ কে চি বেণুগোপালে সংসদত প্ৰধানমন্ত্ৰী নৰেন্দ্ৰ মোদীৰ বিৰুদ্ধে বিশেষাধিকাৰ ভংগৰ প্ৰস্তাৱ উত্থাপন কৰে। কেৰালাৰ কংগ্ৰেছ নেতাজনে অভিযোগ কৰে যে প্ৰধানমন্ত্ৰীয়ে গান্ধী-নেহৰু পৰিয়ালৰ বিষয়ে অপমানজনক মন্তব্য কৰিছে।
বেণুগোপালে দাবী কৰিছে যে মোদীয়ে ফেব্ৰুৱাৰী মাহত বাজেট অধিৱেশনৰ দ্বিতীয় পৰ্বত ছোনিয়া গান্ধী আৰু ৰাহুল গান্ধীৰ বিষয়ে আপত্তিজনক মন্তব্য কৰিছিল। ইয়াৰ পূৰ্বে ১০ ফেব্ৰুৱাৰীত ৰাজ্যসভাত মোদীৰ ভাষণত কংগ্ৰেছে তেওঁৰ এজন "ঘনিষ্ঠ সহযোগী" উদ্যোগপতি গৌতম আদানিৰ বিৰুদ্ধে হিণ্ডেনবাৰ্গৰ প্ৰতিবেদনত জালিয়াতিৰ বিষয়টো উত্থাপন কৰিছিল। সেই সময়ত মোদীয়ে গান্ধী পৰিয়ালক প্ৰত্যুত্তৰ দি কৈছিল, "দেশৰ ৬০০ টা প্ৰকল্পত গান্ধী-নেহৰু পৰিয়ালৰ নাম আছে।
যদি নেহৰুৰ নাম উল্লেখ কৰা নহয়, বহুলোকৰ চুলি থিয় হৈ যায়, তেজ গৰম হৈ পৰে। আমি ভুল নকৰো। কিন্তু নেহৰুৰ পৰিয়ালৰ বংশধৰসকলে নেহৰুৰ উপাধি কিয় ব্যৱহাৰ নকৰে? ইমান লজ্জাজনক কাম কিয় কৰে ?"
ভাষণত মোদীয়ে দাবী কৰিছিল যে নেহৰু আৰু ইন্দিৰাৰ কাৰ্যকালত ৯০ বাৰতকৈও অধিক বাৰ অনুচ্ছেদ ৩৫৬ প্ৰয়োগ কৰি বিভিন্ন ৰাজ্যৰ চৰকাৰ ভংগ কৰা হৈছিল। একেদিনাই কংগ্ৰেছে প্ৰধানমন্ত্ৰীৰ "অভিযোগ"ৰ উত্তৰ দি কৈছিল যে ছোনিয়া-ৰাহুল-প্ৰিয়ংকাই নেহৰু উপাধি ব্যৱহাৰ কৰাৰ কোনো প্ৰশ্নই নাই। কাৰণ তেওঁলোকে নেহৰুৰ জীয়ৰী ইন্দিৰাৰ স্বামী ফিৰোজ গান্ধীৰ উপাধি ব্যৱহাৰ কৰে। যোৱা বছৰৰ ফেব্ৰুৱাৰী মাহত তেলেংগানাৰ শাসকীয় দল ভাৰতীয় ৰাষ্ট্ৰ সমিতিয়েও তেলেংগানা ৰাজ্য গঠন সন্দৰ্ভত আপত্তিজনক মন্তব্যৰ কৰাৰ অভিযোগ তুলি মোদীৰ বিৰুদ্ধে সংসদত বিশেষাধিকাৰ ভংগৰ প্ৰস্তাৱ উত্থাপন কৰিছিল।
Continue Reading
