ডিজিটেল ডেস্ক: কেৰালাত ঘটিল নজিৰবিহীন ঘটনা৷ এইবাৰ ধৰ্ণাত বহিল খোদ ৰাজ্যখনৰ ৰাজ্যপাল৷ আজি সকলোকে আচৰিত কৰি কেৰালাৰ কোল্লামত ধৰ্ণাত বহিল ৰাজ্যপাল আৰিফ মহম্মদ খান৷ ঘটনা অনুসৰি কোল্লামৰ MC ৰোডত থকা এখন চাহৰ দোকানৰ সন্মুখত চকী বহি প্ৰতিবাদত নামিল ৰাজ্যপালগৰাকী৷
কেৰালাৰ SFI কৰ্মীৰ বিৰুদ্ধে এনেদৰে প্ৰতিবাদ সাব্যস্ত কৰিলে ৰাজ্যপাল আৰিফ মহম্মদ খানে৷ দৰাচলতে ৰাজ্যপালৰ কনভয়ক ক’লা পতাকা প্ৰদৰ্শন কৰিছিল একাংশ SFI কৰ্মীয়ে৷ যাক লৈ ক্ষুণ্ণ হৈ পৰিছিল ৰাজ্যপালগৰাকী৷ কেৰালাৰ ৰাজ্যপাল আৰিফ মহম্মদ খানৰ অভিযোগ ৰাজ্যখনৰ শাসনাধিষ্ঠ বাঁওপন্থী চৰকাৰৰ আৰক্ষীয়ে ৰক্ষণাবেক্ষণ দি আহিছে SFI কৰ্মীসকলক৷ যাৰ বাবে SFI কৰ্মীসকলৰ বিৰুদ্ধে ব্যৱস্থাগ্ৰহণৰ ক্ষেত্ৰত আকোঁৰগোঁজ মনোভাৱ গ্ৰহণ কৰি এনেদৰে প্ৰতিবাদত বহিছিল ৰাজ্যপালগৰাকী৷
আৰিফ মহম্মদ খানৰ এনে কাণ্ডৰ পাছতে তৎপৰ হৈ পৰা দেখা যায় কেৰালাৰ আৰক্ষীক৷ ঘটনা সন্দৰ্ভত ১ গোচৰ ৰুজু কৰি আৰক্ষীয়ে গ্ৰেপ্তাৰ কৰে ১৭ গৰাকী SFI কৰ্মীক৷ আনহাতে দুঘণ্টা ধৰি ধৰ্ণা অব্যাহত ৰখা ৰাজ্যপালগৰাকীক FIRৰ কপি দেখুওৱাৰ পাছতহে ধৰ্ণা ত্যাগ কৰি ৰাজভৱন অভিমুখে গমন কৰে ৰাজ্যপাল আৰিফ মহম্মদ খানে৷
ইপিনে ৰাজ্যপাল আৰিফ মহম্মদ খান ধৰ্ণাত বহাৰ পাছতেই ৰাজ্যপালগৰাকী আৰু ৰাজভৱনৰ সুৰক্ষাক লৈ তৎপৰ হৈ পৰা দেখা গ’ল কেন্দ্ৰীয় গৃহ মন্ত্ৰালয়ক৷ ৰাজ্যপাল আৰিফ মহম্মদ খানক Z+ সুৰক্ষা প্ৰদান কৰিছে কেন্দ্ৰীয় গৃহ মন্ত্ৰালয়ে৷ ইপিনে ধৰ্ণাত বহা ৰাজ্যপালগৰাকীৰ বিৰুদ্ধে সোচ্চাৰ হৈ পৰিছে কেৰালাৰ SFI কৰ্মী৷ ৰাজ্যপাল আৰিফ মহম্মদ খানে SFI কৰ্মীক অপৰাধী আখ্যা দিয়াৰ অভিযোগ তুলিছে ছাত্ৰ সংগঠনটোৱে৷
Continue Reading
