ডিজিটেল ডেস্ক; ভূগোলে অঁকা সীমাৰেখাৰ ঊৰ্ধ্বত দুগৰাকী খেলুৱৈৰ সৌম্য আৰু সৌজন্যতাই প্ৰতিষ্ঠা কৰিলে নতুন দৃষ্টান্ত৷ দেশৰ দ্বেষ পাহৰি দুগৰাকী ক্ৰিকেটাৰৰ এটা দৃশ্য এতিয়া সৰ্বত্ৰ চৰ্চিত হৈছে, প্ৰশংসিত হৈছে৷
ভাৰতে পাকিস্তানক এছিয়া কাপ-২০২৩ৰ তৃতীয়খন খেলত জয়ৰ বাবে ২৬৭ ৰাণৰ লক্ষ্য নিৰ্ধাৰণ কৰি দিছিল। এই খেলখনৰ সৈতে সম্পৰ্কিত এখন আকৰ্ষণীয় ফটো এতিয়া ছ’চিয়েল মিডিয়াত ভাইৰেল হৈ পৰিছে৷
ভাৰতৰ ইনিংছৰ সময়ত, পাকিস্তানৰ ক্ৰিকেটাৰ শ্বাদাব খানে হাৰ্ডিক পাণ্ডিয়াৰ জোতাৰ ফিতা বান্ধি দিছিল। নেটিজেনে শ্বাদাবক তেওঁৰ খেলুৱৈসুলভ মনোভাৱৰ বাবে প্ৰশংসা কৰিছে। হাৰ্ডিকে এই খেলখনত ভাৰতৰ হৈ সুন্দৰ প্ৰদৰ্শন কৰিছিল। তেওঁ ৮৭ ৰাণৰ এটা গুৰুত্বপূৰ্ণ ইনিংছ উপহাৰ দিয়ে ভাৰতীয় দলটোক।
ভাৰতীয় অধিনায়ক ৰোহিত শৰ্মাই টছত জয়ী হৈ পাকিস্তানৰ বিৰুদ্ধে প্ৰথমে বেটিং কৰাৰ সিদ্ধান্ত লয়। ভাৰতৰ ইনিংছৰ সময়তে পাণ্ডিয়াৰ জোতাৰ ফিতা খোলা গৈছিল। আৰু সেয়া দেখি শ্বাদাব খানে তেওঁক সহায় কৰিবলৈ আহিছিল। শ্বাদাবে বান্ধি দিছিল হাৰ্ডিকৰ জোতাৰ ফিতা।
হাৰ্ডিকে ঈশান কিষাণৰ সৈতে ভাৰতক এই খেলখনত সংকটৰ পৰিস্থিতিৰ পৰা বাহিৰলৈ আনিছিল। টীম ইণ্ডিয়াই ৬৬ ৰাণৰ স্ক’ৰত ৪ টা উইকেট হেৰুৱাইছিল।
Continue Reading
