ডিজিটেল ডেস্ক: দিল্লীৰ মুখ্যমন্ত্ৰী অৰবিন্দ কেজৰিৱাল প্ৰৱৰ্তন সঞ্চালকালয়ৰ জিম্মাত আছে।
অৰবিন্দ কেজৰিৱালক ২১ মাৰ্চত প্ৰৱৰ্তন সঞ্চালকালয়ে গ্ৰেপ্তাৰ কৰিছিল। তেওঁক দিল্লীৰ সুৰা কেলেংকাৰী সম্পৰ্কীয় গোচৰত গ্ৰেপ্তাৰ কৰা হৈছে। গ্ৰেপ্তাৰ হোৱাৰ পাছৰে পৰা আম আদমী পাৰ্টিৰ সমৰ্থক আৰু কৰ্মীসকল ৰাজপথত আছে। একে সময়তে, আতিশী, সৌৰভ ভৰদ্বাজ, সন্দীপ পাঠক, গোপাল ৰায়কে ধৰি আন নেতাসকলে দলটোৰ সৈতে সম্পৰ্কিত প্ৰতিটো বিষয় সংবাদ মাধ্যমৰ সন্মুখত তুলিবলৈ ধৰিবলৈ চেষ্টা কৰিছে৷ অৰবিন্দ কেজৰিৱালৰ পত্নী সুনীতা কেজৰিৱালো আছে সমুখত৷
কিন্তু, এই সময়ছোৱাত ৰহস্যজনকভাৱে নিৰ্বিকাৰ হৈ আছে আপৰ জ্যেষ্ঠ নেতা তথা ৰাজ্যসভাৰ সাংসদ ৰাঘৱ চাদ্ধা৷ মুখ্যমন্ত্ৰী কেজৰিৱালৰ সৈতে প্ৰায়ে দেখিবলৈ পোৱা ৰাঘৱ চাদ্ধা আছে ক’ত?
যদিও তেওঁ ছ’চিয়েল মিডিয়াত সক্ৰিয় তথাপি দলটোৰ ওপৰত এই সংকটৰ সময়ত ৰাজধানী দিল্লীত তেওঁৰ অনুপস্থিতিয়ে জনসাধাৰণৰ মনত সন্দেহৰ সৃষ্টি কৰিছে। সংবাদ মাধ্যমৰ প্ৰতিবেদনত কোৱা হৈছে যে ৰাঘৱ চকুৰ অস্ত্ৰোপচাৰৰ বাবে লণ্ডনত আছে। বৰ্তমান এই সন্দৰ্ভত কোনো আনুষ্ঠানিক তথ্য লাভ কৰা হোৱা নাই৷
ৰাঘৱ চাদ্ধাৰ স্থিতি সন্দৰ্ভত ছ’চিয়েল মিডিয়াত বহুতো প্ৰশ্ন উত্থাপিত হৈছে। লোকসভা নিৰ্বাচন নিকটত আৰু এনেসময়তে কেজৰিৱালক গ্ৰেপ্তাৰ কৰাৰ বাবে দেশৰ গৰিষ্ঠসংখ্যক নাগৰিকে সুধিছে যো এনে গুৰুত্বপূৰ্ণ সময়ত ৰাঘৱ চাদ্ধা ক’ত আছে?
অৰবিন্দ কেজৰিৱালৰ গ্ৰেপ্তাৰ হোৱাৰ পাছদিনা ‘টাইমছ অব্ ইণ্ডিয়া’ই এটা প্ৰতিবেদন প্ৰকাশ কৰিছিল, সেই প্ৰতিবেদনানুসৰি ৰাঘৱ চাদ্ধা ৮ মাৰ্চৰ পৰা লণ্ডনত আছে। ৰাঘৱ চাদ্ধাই ৯ মাৰ্চত লণ্ডন স্কুল অব্ ইকনমিক্সৰ লণ্ডন ইণ্ডিয়ান ফ'ৰামতো ভাষণ দিছিল। এই তথ্য ৰাঘৱ চাদ্ধাই নিজেই টুইট কৰি দিছিল। ৰাঘৱ চাদ্ধাই পাছত টুইট কৰিছিল যে তেওঁ তেওঁৰ পত্নী পৰিণীতি চোপ্ৰাৰ সৈতে ২০ মাৰ্চত ইউকে সংসদত সাপ্তাহিক প্ৰধানমন্ত্ৰীৰ প্ৰশ্ন (পিএমকিউ)ত উপস্থিত আছিল। পিএমকিউৰ সময়ত, ইউকেৰ প্ৰধানমন্ত্ৰী ঋষি সুনকে বিৰোধী সাংসদসকলৰ প্ৰশ্নৰ উত্তৰ দিয়ে।
ইয়াৰ পাছত, সংবাদ সংস্থা পিটিআইয়ে দলীয় সূত্ৰৰ উদ্ধৃতি দি কয় যে ৰাঘৱ চাদ্ধাৰ লণ্ডনত চকুৰ অস্ত্ৰোপচাৰ কৰা হ'ব। ইফালে, ব্ৰিটেইনৰ লেবাৰ পাৰ্টিৰ সাংসদ প্ৰীত কৌৰ গিলে ৰাঘৱ চাদ্ধাৰ সৈতে হোৱা বৈঠকৰ এখন ফটো টুইট কৰে, যাৰ পাছত ভাৰতীয় জনতা পাৰ্টীয়ে ৰাঘৱ চাদ্ধাৰ ওপৰত আক্ৰমণাত্মক স্থিতি গ্ৰহণ কৰে৷
Continue Reading
