ডিজিটেল ডেস্কঃ সুৰা কেলেংকাৰীত জড়িত থকাৰ অভিযোগত বৰ্তমান তিহাৰ জে’লত বন্দী হৈ আছে দিল্লীৰ মুখ্যমন্ত্ৰী অৰবিন্দ কেজৰিৱাল।
আম আদমি পাৰ্টীৰ আহ্বায়ক তথা দিল্লীৰ মুখ্যমন্ত্ৰী অৰবিন্দ কেজৰিৱালক কাৰাৰুদ্ধ কৰাৰ পাছতে তেওঁৰ ওজন যথেষ্ট হ্ৰাস পোৱা বুলি দাবী কৰিছে আম আদমি পাৰ্টীয়ে। যাক লৈ আপৰ প্ৰতিজন সদস্য উদ্বিগ্ন হৈ পৰিছে। মধুমেহ ৰোগৰ বাবে কেজৰিৱালৰ ওজন হ্ৰাস পাইছে বুলি চিন্তিত হৈ পৰিছে আপৰ সদস্যসকল।
পাছে আপৰ এই দাবী খণ্ডন কৰি তিহাৰ জেল কৰ্তৃক্ষই কয় যে অৰবিন্দ কেজৰিৱালৰ ওজন ৬৫ কেজি আৰু জেলত থকাৰ পাছতো তেওঁৰ ওজন ৬৫ কেজিয়েই হৈ আছে। ওজন কমা নাই কেজৰিৱালৰ।
কেজৰিৱালৰ সুস্বাস্থ্যৰ বাবে সমগ্ৰ দেশৰ লগতে অসমতো অহা ৭ এপ্ৰিল, দেওবাৰে সমূহীয়া উপবাস তথা অনশন কাৰ্যসূচী গ্ৰহণ কৰিছে আম আদমী পাৰ্টীয়ে।
দলটোৰ গনেশগুৰিস্থিত ৰাজ্যিক কাৰ্যালয় এক সংবাদমেল সম্বোধন কৰি আম আদমি পাৰ্টীৰ মুখপাত্ৰ হেমন্ত ফুকনে এই কথা জানিবলৈ দিয়ে। গুৱাহাটীৰ শ্ৰীমন্ত মাধৱদেৱ পথৰ সমীপৰ চচলস্থিত প্ৰতিবাদস্থলীত এই কাৰ্যসূচী ৰূপায়ণ কৰা হ’ব।
দিনৰ ১১ বজাৰ পৰা বিয়লি ৫ বজালৈকে অনুষ্ঠিত হ’বলগীয়া এই সমূহীয়া উপবাসত আপ, অসমৰ সভাপতি ডা৹ ভবেন চৌধুৰীকে ধৰি বিষয়ববীয়াসকল, কামৰূপ (মহানগৰ) সমিতি, জি এম চি সমিতি, মহিলা শক্তি, যুৱ শক্তি আৰু ছাত্ৰ-যুৱ সংগ্ৰাম সমিতিয়ে অংশগ্ৰহণ কৰিব। তদুপৰি, অসমৰ প্ৰতিখন জিলা আৰু সমষ্টি সমিতিয়ে নিজ নিজ স্থানত উক্ত দিনা সমূহীয়া প্ৰতিবাদ তথা অনশন কাৰ্যসূচী ৰূপায়ণ কৰিব।
এই কাৰ্যসূচীত অংশ গ্ৰহণ কৰিবলৈ আম আদমি পাৰ্টীয়ে সাধাৰণ জনতাকো আহ্বান জনাইছে। যিয়ে এই স্থানলৈ গৈ উপবাস কৰিব নোৱাৰে তেওঁলোকক নিজ ঘৰতে বা কৰ্মস্থানত ৭ এপ্ৰিলৰ দিনটো উপবাসে থাকি অৰবিন্দ কেজৰিৱালৰ সুস্বাস্থ্যৰ কামনা কৰিবলৈ আহ্বান জনাইছে।
Continue Reading
