কেজৰিৱালক ‘অভিজ্ঞ চোৰ’ আখ্যা দিলে প্ৰধানমন্ত্ৰী মোদীয়ে, কিন্তু কিয়?

কেজৰিৱালৰ  ঘৰত নোটৰ বাণ্ডিল কিয় পোৱা নাই সেই কথাও উল্লেখ কৰে মোদীয়ে। দিল্লী সুৰা নীতিৰ দুৰ্নীতিৰ অভিযোগত বৰ্তমান অন্তৱৰ্তীকালীন জামিনত আছে  আম আদমী পাৰ্টিৰ মুৰব্বী কেজৰিৱাল। উচ্চতম ন্যায়ালয়ে তেওঁক নিৰ্বাচনী প্ৰচাৰৰ বাবে এই জামিন প্ৰদান কৰিছে। জেলৰ পৰা ওলাই অহাৰ পিছত কেজৰিৱালে অবিৰতভাৱে বিজেপিক আক্ৰমণ কৰি আছে। তেওঁ প্ৰধানমন্ত্ৰী নৰেন্দ্ৰ মোদী আৰু বিজেপিক তেওঁৰ বিৰুদ্ধে ষড়যন্ত্ৰ ৰচনা কৰা বুলি বিভিন্ন সভাই-সমিতিয়ে কৈ আহিছে। এক সাক্ষাৎকাৰৰ সময়ত কেজৰিৱালক সাংবাদিকে প্ৰশ্ন কৰাত কেজৰিৱালে  কৈছিল  যে আনৰ ঘৰত তালাচীৰ সময়ত  নোটৰ বাণ্ডিল পোৱা যায়। মোৰ ঘৰত এটকাও পোৱা নগ’ল। ইয়াৰ প্ৰত্যুত্তৰত প্ৰধানমন্ত্ৰী মোদীয়ে কয়, ‘ চৰকাৰে কেনেকৈ কাম কৰে তেওঁলোকে জানে। নিজকে বচাবলৈ তেওঁলোকে নিশ্চিতভাৱে নিজকে সুৰক্ষিত কৰি ৰাখে ।"

প্ৰধানমন্ত্ৰীয়ে কয়, ‘এজন অভিজ্ঞ চোৰৰ বহুত সুবিধা থাকে। চৰকাৰত থকা যিকোনো বিষয়াই জানিব যে ইডি আৰু চিবিআইয়ে কেনেদৰে ব্যৱস্থা ল’ব। সেইবাবেই আগতীয়াকৈ সকলো লুকুৱাই পেলোৱাৰ ব্যৱস্থা কৰে।"

যেতিয়া প্ৰধানমন্ত্ৰী মোদীক সোধা হৈছিল যে নিৰ্বাচনৰ পূৰ্বে দুজন মুখ্যমন্ত্ৰীক জেলত ভৰোৱাৰ অভিযোগ চৰকাৰৰ বিৰুদ্ধে উঠিছে, এইক্ষেত্ৰত মোদীয়ে কি কয়? । এই প্ৰশ্ন সন্দৰ্ভত মোদীয়ে  কয় যে যদি চৰকাৰে কাৰোবাৰ  অপৰাধ সন্দৰ্ভত একো নকৰে, তেন্তে মানুহে ক’ব যে নিশ্চিতভাৱে কিবা গোপন বুজাবুজি হৈছে। প্ৰধানমন্ত্ৰী মোদীয়ে কয়, নোটৰ পাহাৰ বোৰ দেখিছে নে নাই? এই নোটৰ  পাহাৰবোৰ  দেখাৰ পিছত আপুনি কি ভাবে, এয়া কষ্টোপাৰ্জিত ধন নেকি?  নোটৰ পাহাৰ উদ্ধাৰ কৰিবলৈ  চৰকাৰে কিবা এটা কৰিবই লাগিব, নহ’লে মানুহে ভাবিব যে কিবা  বুজাবুজি আছে। কেৱল দুৰ্নীতিৰ স্বাৰ্থতে  কেজৰিৱালে  দিল্লীৰ শিশুৰ ভৱিষ্যত নষ্ট কৰিব পৰাকৈ স্কুলৰ ওচৰত সুৰাৰ দোকান খুলিলে।”