ডিজিটেল ডেস্ক: ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই অসমক দেশৰ শ্ৰেষ্ঠ পাঁচখন ৰাজ্যৰ অন্যতম কৰি গঢ়ি তুলিব বুলি কৈ আহিছে৷ আনকি, বিগত ডেৰ বছৰত বন্ধ, আন্দোলন-ধৰ্ণা কাৰ্যসূচী নোহোৱাৰ বাবে অসম উন্নতিৰ দিশে দোপতদোপে আগবাঢ়ি গৈছে বুলি শেহতীয়াকৈ মন্তব্য কৰিছে৷
কিন্তু, শেহতীয়াকৈ প্ৰকাশিত নিটি আয়োগৰ মাল্টিডাইমেনশ্যনেল প’ভাৰ্টি ইনডেক্সৰ প্ৰতিবেদনে উন্মোচিত কৰিছে অসমৰ এখন অন্ধকাৰাচ্ছন্ন ছবি৷
ভাৰতৰ দৰিদ্ৰ ৰাজ্যৰ তালিকাত পঞ্চম স্থানত আছে। অসমৰ ৩২.৬৭ শতাংশ লোক এতিয়াও দৰিদ্ৰতাৰ গ্ৰাসত। এই ভয়ংকৰ তথ্য স্পষ্ট হৈছে লোকসভাত। লোকসভাত কেন্দ্ৰীয় স্বাস্থ্য আৰু পৰিয়াল কল্যাণ বিভাগৰ ৰাজ্যিক মন্ত্ৰী ভাৰতী প্ৰৱীণ পাৱাৰে প্ৰদান কৰা বিবৃতিত উন্মোচিত হৈছে এই তথ্য। নিটি আয়োগে শেহতীয়াকৈ প্ৰকাশ কৰা নেচনেল মাল্টিডাইমেনশ্যনেল প’ভাৰ্টি ইনডেক্সৰ এক প্ৰতিবেদনত এই কথা পোহৰলৈ আহিছে।
মন্ত্ৰীজনে প্ৰকাশ কৰা তথ্য অনুসৰি দেশৰ নাগৰিকসকলে যিখিনি ন্যূনতম সা-সুবিধা পাব লাগে, তাৰ ৪৭.৮৭ শতাংশই অসমৰ দৰিদ্ৰ লোকসকলে লাভ নকৰে। নিটি আয়োগে ইয়াক ইণ্টেনছিটি অব ডিপ্লাইভেচন বুলি আখ্যা দিছে। লক্ষ্যণীয় প্ৰসংগ এয়াই যে ৰাষ্ট্রীয় পৰ্যায়ত অসমৰ দৰিদ্ৰতাৰ হাৰ যথেষ্ট বেছি। দৰিদ্ৰতাৰ মাপকাঠী হিচাপে টকা-পইচাৰ পৰা আৰম্ভ কৰি পুষ্টি, মাতৃস্বাস্থ্য, শিক্ষাৰ হাৰ, ৰন্ধনৰ বাবে ব্যৱহৃত ইন্ধন, খোৱাপানী, অনাময় বাসস্থান, বিদ্যুতৰ ব্যৱহাৰ আদিক সামৰি লোৱা হৈছে।
কেন্দ্ৰীয় মন্ত্ৰীগৰাকীৰ বিবৃতিত প্ৰকাশ পোৱা তথ্য অনুসৰি উত্তৰ-পূৰ্বাঞ্চলৰ ৮খন ৰাজ্যৰ ভিতৰত অসমেই হৈছে দৰিদ্ৰ। দেশৰ দৰিদ্ৰ ৰাজ্যৰ শীৰ্ষত আছে বিহাৰ। বিহাৰত দৰিদ্ৰতা ৫১.৯১ শতাংশ। বিহাৰৰ পাছত আছে ঝাৰখণ্ড। তৃতীয় আৰু চতুৰ্থ স্থানত আছে উত্তৰপ্ৰদেশ আৰু মধ্যপ্ৰদেশ। পঞ্চমত আছে যুটীয়াভাৱে অসম আৰু মেঘালয়। আৰু তালিকাৰ শেষত আছে কেৰালা৷
Continue Reading
