ডিজিটেল ডেস্ক: কুশলে আছেনে এই দেশ? দেশৰ মাটিত এতিয়া শিশুৰ তেজ, আকাশত ধৰ্ষিতাৰ আৰ্তনাদ৷ এই দেশত এতিয়া ৰাজনীতিৰ কচৰতৰ বাবে ব্যৱহাৰ হৈছে ধৰ্ষিতাৰ উচুপনিক৷ কি বিপন্ন সময়!
এগৰাকী ধৰ্ষিতাই জীৱনভিক্ষা কৰিলেও দুৱাৰ জপাই দিয়ে ঘৰৰ গৰাকীয়ে৷ সহায় কৰিবলৈ আগবাঢ়ি নাহে আধুনিক মানুহ! এই পৰিৱেশ আমাৰ দেশ ভাৰতবৰ্ষত পূৰ্বতে সুলভ নাছিল৷ এনে মানসিকতা এই দেশত তেনেই নতুন৷ একাংশ নাগৰিকৰ এনে মানসিকতাৰ বাবে চৰকাৰো জানো জগৰীয়া নহয়?
নাৰীৰ সুৰক্ষাৰ কথা কোৱা চৰকাৰে ৩৩% মহিলাৰ সংৰক্ষণৰ প্ৰসংগৰে প্ৰশংসা আদায়ৰ চেষ্টা চলিছে৷ কিন্তু বাস্তৱত হৈছে কি? বাস্তৱত ঘটিছে নৃশংস নাৰকীয় ঘটনা৷ যি ঘটনাৰ বৰ্ণনা অত্যন্ত বেদনাদায়ক৷ এখন সভ্য-শৃংখলিত সমাজত এনে খবৰ আশা কৰা নাযায়৷ অসংবেদনশীলতাৰ চূড়ান্ত প্ৰদৰ্শন দেখা গৈছে শেহতীয়া সময়বোৰত৷ অথচ, চৰকাৰৰ কোনো পৰিকল্পনা নাই, নাই কোনো সজাগতামূলক কৰ্মপন্থা৷ ধৰ্ষণ, হত্যাক লৈ চলাই গৈছে ৰাজনীতিৰ চকা৷
মধ্য প্ৰদেশৰ উজ্জয়িনীৰ ৰাজপথত সহায় বিচাৰি অৰ্ধউলংগ আৰু ৰক্তক্ষৰা এগৰাকী ১২ বছৰীয়া কিশোৰীক ভ্ৰমি ফুৰা অৱস্থাত পোৱা গৈছিল। চহৰখনৰ দণ্ডী আশ্ৰমৰ ওচৰত নাবালিকাগৰাকীক ধৰ্ষণ কৰা হৈছিল। অঞ্চলটোৰ চিচিটিভিত ধৰ্ষিতাগৰাকীৰ এটা আৱাসিক চুবুৰীয়াৰ পথত বিভ্ৰান্ত অৱস্থাত ঘূৰি ফুৰাৰ দৃশ্য বন্দী হৈছিল। ফুটেজটোত শিশুটোক এজন ব্যক্তিৰ বাসগৃহৰ বাহিৰত সহায় বিচৰা দেখা যায়, কিন্তু সহায় কৰাৰ সলনি গৰাকীয়ে জপাই দিলে দুৱাৰ৷
ইপিনে, ৰাজস্থানৰ চিকাৰৰ এটা কুঁৱাত উদ্ধাৰ হোৱা এগৰাকী ১৫ বছৰীয়া কিশোৰীক বলাৎকাৰ কৰি হত্যা কৰাৰ অভিযোগত দুজন লোকক গ্ৰেপ্তাৰ কৰা হৈছে। অভিযুক্তসকলক সমীৰ আৰু গুলাম বুলি চিনাক্ত কৰা হৈছিল। ঘটনাটোত এজন নাবালককো আটক কৰা হৈছিল আৰু তিনিওজনকে জেৰা কৰা হৈছে বুলি আৰক্ষীয়ে কয়। চুৰুৰ দশম শ্ৰেণীৰ ছাত্ৰজন দেওবাৰে নিৰুদ্দেশ হৈছিল। আৰক্ষীয়ে ভুক্তভোগীৰ পৰিয়ালৰ নিৰুদ্দেশ অভিযোগৰ ভিত্তিত এটা তদন্ত আৰম্ভ কৰিছিল আৰু সোমবাৰে আবেলি এটা কুঁৱাত ভুক্তভোগীৰ মৃতদেহটো উদ্ধাৰ কৰিছিল৷
ফতেহপুৰৰ প্ৰাক্তন বিধায়ক নন্দ কিশোৰ মাহৰিয়া আৰু অন্যান্য বিজেপি নেতাসকলে পৰিয়ালটোৰ বাবে ন্যায়ৰ দাবীত এক অৱস্থান প্ৰদৰ্শন কৰিছিল। ছোৱালীজনীৰ পৰিয়ালে তিনিজন লোকৰ বিৰুদ্ধে অপহৰণ, দলবদ্ধ ধৰ্ষণ, ব্লেকমেইলিং আৰু হত্যাৰ অভিযোগ উত্থাপন কৰিছিল। জিলা বিষয়াসকলে তেওঁলোকক উচিত তদন্তৰ আশ্বাস দিছিল আৰু অভিযুক্তসকলক জেৰাৰ বাবে জিম্মাত লোৱা হৈছিল।
তাৰ পাছত, এটা ধৰ্ষণ আৰু হত্যাৰ গোচৰ ৰুজু কৰা হয় আৰু তিনিজন লোকক গ্ৰেপ্তাৰ কৰা হয়। প্ৰতিবাদকাৰীসকলে পৰিয়ালটোক আৰ্থিক সাহায্যৰ দাবী জনাইছিল। বিজেপিয়ে ঘটনাটোক লৈ অশোক গেহলট চৰকাৰক লক্ষ্য কৰি লৈছে। ৰাজ্যিক বিজেপিৰ মুখপাত্ৰ লক্ষ্মীকান্ত ভৰদ্বাজে কয়, ধৰ্ষণৰ পিছত আমাৰ ছোৱালীবোৰৰ মৃতদেহ কুঁৱাৰ পৰা উলিয়াই অনাৰ এই ভয়ংকৰ দৃশ্যবোৰ এতিয়া কংগ্ৰেছৰ জংঘল ৰাজত সাধাৰণ হৈ পৰিছে।
এতিয়া বিজেপিৰ মন্তব্যক উভতি ধৰিছে কংগ্ৰেছ নেত্ৰী সুপ্ৰিয়া শ্ৰীনেটে৷ শ্ৰীনেটেই কয়, চৰকাৰক সুধিব বিচাৰোঁ যে এই ছোৱালীজনী কেনেকৈ সাতনাৰ পৰা উজ্জয়িনী পালে? বাতৰি কাকতত বাতৰি প্ৰকাশ হোৱাৰ পাছতো কিয় কোনো ব্যৱস্থা লোৱা হোৱা নাছিল? উজ্জয়িনী আৰক্ষীয়ে অপৰাধ আৰু অপৰাধী ট্ৰেকিং নেটৱৰ্ক প্ৰণালী কিয় পৰীক্ষা কৰা নাছিল?
ছোৱালীজনীৰ উপভাষা আছিল বাঘেলখণ্ড, তেন্তে উজ্জয়িনী আৰক্ষীয়ে তেওঁক উত্তৰ প্ৰদেশৰ পৰা কিয় মাতিছিল? ৮ কিলোমিটাৰ খোজ কাঢ়ি নিজকে, দেউতাক, ককাদেউতাক আৰু গাঁওনৰ নাম সঠিকভাৱে ৰখা ছোৱালীজনীক মানসিকভাৱে বিকলাংগ আৰু ভিক্ষাৰী বুলি কিয় বৰ্ণনা কৰা হৈছিল? মধ্য প্ৰদেশৰ মুখ্যমন্ত্ৰী আৰু গৃহমন্ত্ৰী কিয় নীৰৱ? এই প্ৰশ্ন এতিয়া উত্থাপন কৰিছে সুপ্ৰিয়া শ্ৰীনেটে৷
Continue Reading
