ডিজিটেল ডেস্কঃ দুটাকৈ বিশ্বকাপ আৰু চেম্পিয়নছ ট্ৰফী জয় কৰাৰ বাবেই নহয়, তেওঁৰ ব্যৱহাৰৰ বাবেও সকলোৱে ভাল পায়। বহু প্ৰাক্তন ক্ৰিকেটাৰেও মহেন্দ্ৰ সিং ধোনীক সন্মান কৰে। ধোনীৰ অনুৰাগী আনকি প্ৰাক্তন ক্ৰিকেটাৰ তথা প্ৰশিক্ষক ৰবি শাস্ত্ৰীও।
ভাৰতৰ প্ৰাক্তন প্ৰশিক্ষকগৰাকীয়ে কয় যে তেওঁৰ মনলৈ প্ৰথমে আহিছিল ধোনীক অধিনায়ক হিচাপে গঢ়ি তোলাৰ কথা। ২০০৭ চনত প্ৰথমবাৰৰ বাবে ভাৰতীয় দলৰ নেতৃত্ব দিছিল ধোনীয়ে। তাৰ আগতে ৰাহুল দ্ৰাবিড় ভাৰতীয় দলৰ অধিনায়ক আছিল। সেই সময়তে দ্ৰাবিড় অসুস্থ হৈ পৰিছিল।
দ্ৰাবিড়ৰ অসুস্থতাৰ বাবে তেতিয়াৰ নিৰ্বাচক দিলীপ বেংছাৰকাৰে কাক অধিনায়ক বনাব লাগে সেই বিষয়ে চিন্তা কৰি আছিল। তেওঁ দলৰ তেতিয়াৰ মেনেজাৰ ৰবি শাস্ত্ৰীক সুধিছিল কাক অধিনায়ক বনাব পাৰি।
সেই কাণ্ডৰ কথা উল্লেখ কৰি শাস্ত্ৰীয়ে কয়, “২০০৭ চনত মই টিম মেনেজাৰ আৰু দিলীপ চিলেক্টৰ আছিল। ইডেনত অনুশীলনৰ সময়ত আঘাতপ্ৰাপ্ত হয় দ্ৰাবিড়। আমি কথা পাতি আছিলো কোন কেপ্তেইন হ’ব লাগে। হঠাৎ ধোনিৰ নামটো মনলৈ আহে। মই ক'লোঁ- "এই ল'ৰাটোৰ নেতৃত্ব দিয়াৰ ক্ষমতা আছে।" দিলীপেও একেই কথা ক’লে। সেইবাবেই ধোনীক অধিনায়ক বনাবলৈ বিশেষ চিন্তাৰ প্ৰয়োজন হোৱা নাছিল। মেচৰ গতি বুজিব পৰা ক্ষমতা, দ্ৰুত সিদ্ধান্ত লোৱাৰ ক্ষমতা, ব্যক্তিত্ব সকলো ধোনিৰ মাজত আছে।"
পৰৱৰ্তী সময়ত শাস্ত্ৰী ভাৰতীয় দলৰ প্ৰশিক্ষক হয়। সেই সময়ত ধোনিৰ সৈতেও তেওঁ কাম কৰিছিল। শেহতীয়াকৈ শাস্ত্ৰীয়ে কয় যে ধোনিৰ নেতৃত্বত তেওঁও খেলিবলৈ পোৱা হ’লে মজা লাগিলহেঁতেন। শাস্ত্ৰীয়ে কয়- ''অধিনায়ক হিচাপে তেওঁৰ সফলতা সঁচাকৈয়ে চাবলগীয়া দৃশ্য।"
উল্লেখ্য যে ধোনীক শেষবাৰৰ বাবে ২০১৯ চনত ভাৰতৰ হৈ খেলা দেখা গৈছিল। ২০২০ চনৰ ১৫ আগষ্টত তেওঁ আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰে। তেতিয়াৰ পৰা তেওঁক কেৱল আই পি এলত খেলা দেখা যায়। এই বছৰ ধোনীৰ আই পি এলৰ অন্তিমখন খেল হ’ব বুলি জল্পনা-কল্পনাৰ সৃষ্টি হৈছে। অৱশ্যে ভাৰতৰ বিশ্বকাপ বিজয়ী অধিনায়কগৰাকীয়ে এই সন্দৰ্ভত একো কোৱা নাই।
Continue Reading
