ডিজিটেল ডেস্কঃ মণিপুৰত পুনৰবাৰ সংঘটিত হৈছে হিংসাত্মক ঘটনা। মঙলবাৰে ৰাজ্যৰ ৰাজধানী ইম্ফলত দুজন যুৱকৰ হত্যাকাণ্ডৰ বিৰুদ্ধে প্ৰতিবাদ সাব্যস্ত কৰা প্ৰতিবাদকাৰীক আৰক্ষীয়ে লাঠিচালনা কৰে। ইয়াৰ বাবে ৩০ জনতকৈ অধিক ছাত্ৰ-ছাত্ৰী আহত হৈছে।
দৰাচলতে জুলাই মাহত দুজন যুৱকক অপহৰণ কৰা হৈছিল। দুয়োগৰাকী শিক্ষাৰ্থীৰ নাম ফিজাম হেমজিৎ (২০) আৰু হিজাম লিন্থোইংগাম্বী (১৭)। শিক্ষাৰ্থী দুজনৰ মৃতদেহৰ ফটো ছ’চিয়েল মিডিয়াত ভাইৰেল হোৱাৰ পাছতে ছাত্ৰ-ছাত্ৰীসকলে চৰকাৰৰ বিৰুদ্ধে প্ৰতিবাদ সাব্যস্ত কৰিবলৈ আৰম্ভ কৰে।
সংবাদ সংস্থা পিটিআইৰ তথ্য অনুসৰি আৰক্ষীয়ে জনোৱা মতে, যেতিয়া নিৰাপত্তা বাহিনীয়ে প্ৰতিবাদকাৰীক মুখ্যমন্ত্ৰীৰ সচিবালয়ৰ দিশে গতি কৰাত বাধা দিবলৈ চেষ্টা কৰিছিল তেতিয়া আৰক্ষীৰ সৈতে তেওঁলোক সংঘৰ্ষত লিপ্ত হয়। আহত প্ৰতিবাদকাৰী সকল বৰ্তমান বিভিন্ন চিকিৎসালয়ত চিকিৎসাধীন হৈ আছে।
সোমবাৰে (২৫ ছেপ্টেম্বৰ) মুখ্যমন্ত্ৰী এন বীৰেণ সিঙৰ সচিবালয়ে এক বিবৃতিত কয় যে গোচৰটো তদন্তৰ বাবে চিবিআইক গতাই দিয়া হৈছে।বিবৃতিটোত কোৱা হৈছে যে ৰাজ্যৰ আৰক্ষীয়ে কেন্দ্ৰীয় নিৰাপত্তা সংস্থাৰ সহযোগত মৃতকৰ নিৰুদ্দেশৰ পৰিস্থিতিৰ বিষয়ে জানিবলৈ আৰু তেওঁলোকক হত্যা কৰা ষড়যন্ত্ৰকাৰীক চিনাক্ত কৰিবলৈ তদন্ত চলাই আছে। অভিযুক্তক গ্ৰেপ্তাৰ কৰিবলৈ নিৰাপত্তা বাহিনীয়েও তালাচী অভিযান আৰম্ভ কৰিছে।
সোমবাৰে নিশা ছচিয়েল মিডিয়াত ভাইৰেল হৈ পৰে নিৰুদ্দেশ হোৱা ছাত্ৰকেইজনৰ দুখন ছবি। ইয়াৰে এখন ফটোত দুজন অস্ত্ৰধাৰী লোকৰ সৈতে শিক্ষাৰ্থী দুজনক দেখা গৈছে আৰু আনখন ফটোত দুটা মৃতদেহ দেখা গৈছে।
Continue Reading
