ডিজিটেল ডেস্কঃ আইনৰ হাত যে অতি দীঘল, সেই কথা পুনৰবাৰ প্ৰমাণিত হ’ল মধ্যপ্ৰদেশৰ খাৰগোন জিলাত। ১৯৭৯ চনত এটা চুৰি কাণ্ড সংঘটিত কৰি বিগত ৪৫ বছৰ ধৰি আৰক্ষীৰ চকুৰ পৰা আঁতৰি থকা এজন ব্যক্তিক অৱশেষত আৰক্ষীয়ে গ্ৰেপ্তাৰ কৰিবলৈ সক্ষম হৈছে। ২০ বছৰ বয়সত অপৰাধৰ জগতত ভৰি দিয়া এই ব্যক্তিজনৰ বৰ্তমান বয়স ৬৫ বছৰ।
আৰক্ষীৰ সূত্ৰৰ পৰা জানিব পৰা মতে, ১৯৭৯ চনত অভিযুক্তজনৰ বিৰুদ্ধে ভাৰতীয় দণ্ডবিধিৰ ৩৭৯ ধাৰাৰ অধীনত এক গোচৰ ৰুজু কৰা হৈছিল। সেই সময়ত মাত্ৰ ২০ বছৰীয়া যুৱকজনে এই কাণ্ড সংঘটিত কৰি পলায়ন কৰিছিল। পৰৱৰ্তী সময়ত আদালতত হাজিৰ নোহোৱাৰ বাবে তেওঁক পলাতক বুলি ঘোষণা কৰা হৈছিল।
কেনেকৈ ধৰা পৰিল অভিযুক্ত?
শেহতীয়াকৈ খাৰগোন আৰক্ষী অধীক্ষকৰ নিৰ্দেশত পুৰণি আৰু অমীমাংসিত গোচৰসমূহৰ বিৰুদ্ধে এক বিশেষ অভিযান চলোৱা হৈছিল। এই অভিযানৰ অংশ হিচাপে আৰক্ষীয়ে গোপন সূত্ৰৰ পম খেদি মহাৰাষ্ট্ৰত অভিযুক্তজনৰ অৱস্থিতি ধৰা পেলায়। আৰক্ষীৰ এটা দলে পৰিকল্পিতভাৱে অভিযান চলাই বৃদ্ধ অভিযুক্তজনক গ্ৰেপ্তাৰ কৰে।
খাৰগোন আৰক্ষীয়ে সংবাদ মাধ্যমক জনোৱা মতে, "অপৰাধী যিয়েই নহওক বা যিমান বছৰ পুৰণি নহওক, তেওঁ সাৰি যাব নোৱাৰে। এই গ্ৰেপ্তাৰে আমাৰ বিভাগৰ সক্ৰিয়তা প্ৰমাণ কৰে।"
Continue Reading
