ডিজিটেল ডেস্কঃ খেলপথাৰতে মৃত্যুক আঁকোৱালি ল’লে এগৰাকী ফুটবলাৰে। এই ঘটনাই ফুটবল জগতত শোকৰ ছাঁ পেলাইছে। মৃত্যু হোৱা ফুটবলাৰগৰাকী হৈছে বেলজিয়ামৰ গ’লৰক্ষক আৰ্নে এস্পিল। বেলজিয়ামৰ ফুটবল লীগৰ দ্বিতীয় ডিভিজনত ৱিঙ্কেল ক্লাবৰ গ’লৰক্ষক হিচাপে খেলি আহিছে আৰ্নেই।
আৰ্নেই মৃত্যু হয় ৱিঙ্কেল বনাম ৱেষ্ট্ৰোজবেক ক্লাবৰ মাজত খেল চলি থকা অৱস্থাত। মেচখনৰ প্ৰথমাৰ্ধত ২-১ অগ্ৰগতিত আগবাঢ়ি আছিল ৱিংকেল। কিন্তু দ্বিতীয়াৰ্ধৰ আৰম্ভণিতে ৱেষ্ট্ৰোজবেকে পেনাল্টি পাইছিল। ২৫ বছৰীয়া গ’লৰক্ষক আৰ্নেই পেনাল্টিটো ৰক্ষা কৰে। কিন্তু তাৰ পিছতে তেওঁ মাটিত ঢলি পৰে।
যুদ্ধকালীন তৎপৰতাৰে খেলপথাৰতে তেওঁৰ চিকিৎসা কৰা হয়। কিন্তু চিকিৎসালয়ত উপস্থিত হোৱাৰ পিছত চিকিৎসকে তেওঁক মৃত ঘোষণা কৰে। গ’লৰক্ষকগৰাকীৰ মৃত্যুৰ কাৰণ এতিয়াও জানিব পৰা হোৱা নাই।
ৱিঙ্কেল ক্লাবে এক বিবৃতিযোগে সমগ্ৰ ঘটনাটোত দুখপ্ৰকাশ কৰি কয়- “এইটো এটা ভয়ংকৰ ঘটনা। কি হৈছিল সেইটোৱে বুজি পৰা নাই।’’
Continue Reading
