ডিজিটেল ডেস্কঃ ২০২০ চনত তেওঁলোকে সংসাৰৰ পাতনি মেলিছিল। তিনি বছৰৰ পাছত পুনৰ বিবাহ অনু্ষ্ঠানৰ আয়োজন কৰিছে হাৰ্দিক পাণ্ডিয়া আৰু নাটাছা ষ্টেনক’ভিচে। ১৪ ফেব্ৰুৱাৰীত ভেলেণ্টাইন ডে’ৰ দিনাই উদয়পুৰত বিবাহপাশত আবদ্ধ হৈছে হাৰ্দিক আৰু নাটাছা।
সোমবাৰে পুত্ৰ অগস্ত্যৰ সৈতে উদয়পুৰলৈ ৰাওনা হয় হাৰ্দিক-নাটাছা। হাৰ্দিকৰ দাদা ক্ৰুনাল পাণ্ডিয়া আৰু নবৌয়েক পংখুৰী শৰ্মা আৰু তেওঁলোকৰ পুত্ৰ কবীৰো তেওঁলোকৰ লগত আছিল।
মঙলবাৰে পুৱা উদয়পুৰলৈ যাত্ৰা কৰিছে বিৰাট কোহলী আৰু অনুষ্কা শৰ্মা। নৱবিবাহিত আথিয়া শ্বেট্টী আৰু কে এল ৰাহুলেও দুপৰীয়াৰ ভাগত বিমানেৰে উদয়পুৰলৈ ৰাওনা হৈছে।
ভাৰতীয় ক্ৰিকেট দলৰ সকলো সদস্যই বিবাহ অনুষ্ঠানৰ আমন্ত্ৰণ তালিকাত আছে। বতাৰি অনুসৰি এইবাৰৰ আই পি এলৰ পিছতে তাৰকা যুটিটোৱে আয়োজন কৰিব বিয়াৰ অভ্যৰ্থনা পাৰ্টি।
হাৰ্দিক আৰু নাটাছাৰ প্ৰেমকাহিনী ৰোমাঞ্চকৰ। দুয়োৰে মাজত প্ৰথম কথা-বতৰা হৈছিল মুম্বাইৰ এটা নাইট ক্লাবত। হাৰ্দিকে প্ৰথম দৃষ্টিত নাটাছাক ভাল পায়। ২০২০ চনৰ ১ জানুৱাৰীত তেওঁলোকৰ বাগ্দান হৈছিল। কেইমাহমান পিছত বিয়াও পাতিলে। সেই বিয়া পতা হৈছিল কেৱল আইনগতভাৱে। সেই বছৰৰে জুলাই মাহত নাটাছাই এটা সন্তান জন্ম দিলে। পুত্ৰ অগস্ত্যক লৈ ব্যস্ত হৈ পৰিছে দম্পতীহাল। মুঠতে হাৰ্দিক আৰু নাটাছাই যোৱা তিনিবছৰত সমূহীয়া বিয়াৰ বাবে সময় উলিয়াব পৰা নাছিল।
সেয়ে চলিত বৰ্ষৰ ১৪ ফেব্ৰুৱাৰীৰ প্ৰেম দিৱসৰ দিনাই ৰাজস্থানৰ উদয়পুৰত হাৰ্ডিক-নাটাছাৰ বিবাহ অনুষ্ঠান অনুষ্ঠিত হ’ব। ইতিমধ্যে নাটাছাই বিয়াৰ বাবে পোছাক বাছি লৈছে। বিশেষ দিনটোত কইনাক বগা গাউন পিন্ধা দেখা যাব।
Continue Reading
