ডুমডুমাত অনুষ্ঠিত হৈছে আন্তঃজিলা খো খো প্ৰতিযোগিতা; ইয়াৰ পৰাই ৰাষ্ট্ৰীয় খো খোত অংশগ্ৰহণ কৰিবলৈ অসম ৰাজ্যিক দলৰ বাছনি কৰা হ’ব

ডিজিটেল ডেস্ক: ৫ আৰু ৬ জানুৱাৰীত ডুমডুমা মহাবিদ্যালয়ৰ খেলপথাৰত অসম খো খো সন্থাৰ তত্ত্বাৱধানত, তিনিচুকীয়া জিলা খো খো সন্থাৰ সৌজন্যত, অসম জাতীয়তাবাদী যুৱ ছাত্ৰ পৰিষদ ডুমডুমা আঞ্চলিক সমিতিৰ উদ্যোগত আৰু ডুমডুমা মহাবিদ্যালয় আৰু বীৰ ৰাঘৱ মৰাণ আদৰ্শ মহাবিদ্যালয়ৰ আতিথ্যত ১৯সংখ্যক ছিনিয়ৰ আন্তঃজিলা খো খো প্ৰতিযোগিতা অনুষ্ঠিত হয়৷  

পতাকা উত্তোলন, স্মৃতি তৰ্পণ, সুধাকণ্ঠ ভূপেন হাজৰিকা আৰু অমৃত শিল্পী জুবিন গাৰ্গৰ আৰু ৰাজীৱ শদিয়াৰ ফটোত মাল্যপৰ্ণকে ধৰি বিভিন্ন সাংস্কৃতিক কাৰ্যসূচীৰে শুভাৰম্ভ হোৱা প্ৰতিযোগিতাখনত অসমৰ মুঠ ১৬খন জিলাই অংশগ্ৰহণ কৰে৷ 

উদ্বোধনী অনুস্থানত অসম খো খো সন্থাৰ সভাপতি ৰাজীৱ প্ৰকাশ বৰুৱা, অসম জাতিয়তাবাদী যুৱ ছাত্ৰ পৰিষদৰ উপদেষ্টা কণ গগৈ, যুৱ ছাত্ৰ পৰিষদৰ সহকাৰী সম্পাদক সুৰজিত মৰাণ, ডুমডুমা মহাবিদ্যালয়ৰ অধ্যক্ষ ড০ কমলেশ্বৰ কলিতা বীৰ ৰাঘৱ মৰাণ মহাবিদ্যালয়ৰ অধ্যক্ষ ড০ অমৰজ্যোতি শইকীয়াৰ লগতে জিলাখনৰ বহু গণ্যমান্য ব্যক্তিৰ উপৰিও জাতীয় জনগোষ্ঠীয় দল সংগঠনৰ বিষয়ববীয়া উপস্থিত থাকে৷ 

উল্লেখযোগ্য যে, এই খো খো প্ৰতিযোগিতাখনৰ পৰাই ৰাষ্ট্ৰীয় খো খোত অংশগ্ৰহণ কৰিবলৈ অসম ৰাজ্যিক দলৰ বাছনি কৰা হ’ব৷