ডিজিটেল ডেস্কঃ অভিনেতা চনু সুদৰ যেন বহুতৰে বাবে ভগৱান৷ অভিনেতাগৰাকীক কেতিয়াবা দুখীয়া শিক্ষাৰ্থীৰ কাষত, কেতিয়াবা বান বিধ্বস্ত জনতাৰ কাষত অথবা কেতিয়াবা কৃষকৰ কাষত থকা দেখা যায়৷ এইবাৰ চনু সুদক দেখা গ’ল অন্য এক ৰূপত৷ যোৱা তিনি বছৰ ধৰি নায়কগৰাকীয়ে ৰাজহুৱা সেৱাক জীৱনৰ ব্ৰত হিচাপে লৈছে। এইবাৰ তেওঁ আকৌ কি কৰিলে?
অভিনেতা চনু সুদৰ মানৱতাবাদী হিচাপে বেছ খ্যাতি আছে। শেহতীয়াকৈ অনুৰাগীসকলৰ মংগলাৰ্থে চনু সুদে এক বিশেষ কাম কৰিছে৷ কামটো দেখাত সাধাৰণ যদিও এই কামটোৱেই হয়তো বহুতৰে প্ৰাণ ৰক্ষা কৰিব পাৰে৷ শেহতীয়াকৈ চনু সুদৰ এটা ভিডিঅ' ভাইৰেল হৈছে। তাত চনুক চাহ-চিগাৰেটৰ দোকান এখনত থিয় হৈ এজন ব্যক্তিৰ সৈতে কথা পাতি থকা দেখা গৈছে। মানুহজনে গুটখা চোবাই আছিল। চনুৱে সুধিলে "তুমি কি চোবাই আছা?"
চনু সুদৰ প্ৰশ্নত মানুহজন অপ্ৰস্তুত হৈ পৰিছিল। চনু তাতেই ৰৈ যোৱা নাছিল। তেওঁ ক'লে, " তোমাৰ এটা পৰিয়াল আছে। তুমি তোমাৰ জীৱন কিয় নষ্ট কৰি আছে? গুটখা স্বাস্থ্যৰ বাবে কিমান ক্ষতিকাৰক তুমি জানানে? ইয়াৰ বাবে তোমাৰ পৰিয়ালে ভুগিবলগীয়া হ’ব পাৰে। তুমি সেয়া নাভাবা নেকি?যোৱা মুখৰ পৰা এতিয়াই পেলাই থৈ আহা" মানুহজনে তাৰ পিছত আৰু ৰৈ নাথাকিল। তেওঁ লগে লগে মুখৰ ভিতৰত ৰখা গুটখা খিনি মুখৰ পৰা উলিয়াই পেলাই দিলে৷
ইয়াৰ পিছত, চনুৱে পান দোকানৰ মালিকক কোৱা শুনা গ’ল , "সেইবোৰ আৰু তেওঁক বিক্ৰী নকৰিব। তেওঁৰ এটা পৰিয়াল আছে। "
অভিনেতা চনু সুদৰ এনে কৰ্মৰ প্ৰভাৱ হয়তো বহুতৰে ওপৰতে পৰিব৷ গুটখাৰ ফলতে এতিয়া বহুতে নানান ৰোগত ভুগিবলগীয়া হৈছে৷ সেই কথা চনু সুদে ভালদৰেই বুজাই দিবলৈ সক্ষম হ’ল৷ কোভিডৰ সময়ত তেওঁ প্ৰব্ৰজনকাৰী শ্ৰমিকসকলক ঘৰলৈ ঘূৰাই পঠিওৱাত সহায় কৰিছিল। বিভিন্ন ৰাজ্যৰ হাজাৰ হাজাৰ শ্ৰমিকক তেওঁ নিজৰ গাঠিৰ ধন ভাঙি শ শ বাছেৰে ঘৰলৈ ঘূৰাই পঠিয়াইছিল৷ চনুৱে বিহাৰৰ এগৰাকী যুৱতী প্ৰিয়ংকা গুপ্তাক ভৰিৰ ওপৰত থিয় হ'বলৈ সহায় কৰিছিল। প্ৰিয়ংকাই এখন চাহৰ দোকান খুলিব বিচাৰিছিল, কিন্তু স্থানীয় ৰাজনৈতিক নেতাসকলে খুলিবলৈ অনুমতি দিয়া নাছিল। শেষত চনু আহিল। প্ৰিয়ংকাই দোকানখন খুলিবলৈ সক্ষম হৈছিল৷
Continue Reading
