ডিজিটেল ডেস্কঃ সফলতা আৰু বিফলতা এজন খেলুৱৈৰ জীৱনৰ অংশ। সমৰ্থকসকলে সফল হ’লে মূৰ ওপৰলৈ তুলি নাচে। আকৌ বিফলতাত সমালোচনা কৰে। একাংশ লোকে ছ’চিয়েল মিডিয়াতো ব্যংগ কৰে। সংবাদ মাধ্যমেও সমালোচনা কৰে। এই সকলোবোৰ লৈ খেলুৱৈয়ে আগুৱাই যাব লাগিব। এইদৰেই ভাবে কে এল ৰাহুলে।
কেইবাদিনো ৰাহুল ছন্দত নাই। লক্ষ্ণৌ ছুপাৰ জায়েন্টছৰ অধিনায়কগৰাকী আঘাতৰ বাবে আই পি এলৰ পৰা বাদ পৰিছে। এতিয়া অস্ত্ৰোপচাৰৰ অন্তত সুস্থ হৈ উঠিছে। ইফালে ক্ৰীড়াপ্ৰেমীৰ বিভিন্ন প্ৰতিক্ৰিয়াক লৈ ৰাহুলে নিজৰ মতামত ব্যক্ত কৰে।
সেই বিষয়ে এটা সাক্ষাৎকাৰত ৰাহুলে শেহতীয়াকৈ কয়, ‘এনেধৰণৰ কথাই মোক কেতিয়াবা অলপ প্ৰভাৱিত কৰে। দলৰ আনসকলকো কৰে। কিন্তু বেয়া সময়তহে খেলুৱৈসকলক অধিক সহায়ৰ প্ৰয়োজন হয়। বহুতে ভাবে যে নিজৰ ইচ্ছামতে কোৱা বা মন্তব্য কৰাৰ অধিকাৰ আছে। আমি সেইটোৰ মাজেৰেই পাৰ হ’ব লাগিব। আচলতে এইটোৱেই আমাৰ জীৱন। খেলখনেই আমাৰ সকলো। যেনেকৈ মই ক্ৰিকেটৰ বাহিৰে একো নাজানো।''
ৰাহুলে কয়, ‘ক্ৰিকেটেই মোৰ একমাত্ৰ কাম। গতিকে সেই কামটোৰ প্ৰতি মই যথেষ্ট গুৰুত্ব নিদিওঁ বুলি কিয় ধৰি লওঁ? মই যথেষ্ট কষ্ট কৰা নাই বুলি কিয় ধৰি লোৱা হ’ব? দুৰ্ভাগ্যজনকভাৱে বহুতৰে ক্ৰীড়াৰ লগত কোনো সম্পৰ্ক নাই।’’
উস্সেথ্য যে অষ্ট্ৰেলিয়াৰ বিৰুদ্ধে শেহতীয়া প্ৰথম দুখন টেষ্টতো ৩৭ ৰান সংগ্ৰহ কৰি ভাৰতীয় দলৰ পৰা বাহিৰ হৈছিল ৰাহুল। ছন্দত নথকা সময়ত তেওঁ বিভিন্ন ধৰণৰ ঠাট্টা-মস্কৰা সহ্য কৰিবলগীয়া হৈছিল।
Continue Reading
