কিশোৰৰ পেটৰ ভিতৰত উদ্ধাৰ ৩ ফুট দীঘল ইউএছবি তাঁৰ! কেনেকৈ বাহিৰলৈ আনিলে চিকিৎসকসকলে

ডিজিটেল ডেস্ক : বিগত কিছুদিন ধৰি পেটৰ বিষত আক্ৰান্ত আছিল এগৰাকী ১৫ বছৰীয়া কিশোৰ। পেটৰ অত্যন্ত বিষত কোনো দৰবেই কাম কৰা নাছিল নাবালকজনৰ। কিছুদিন পাছত মূৰ ঘূৰোৱাৰ পৰা আৰম্ভ কৰি পেটৰ বিষে ক্ৰমাৎ তীব্ৰ ৰূপ ধাৰণ কৰে। শেষত পিতৃ-মাতৃয়ে তেওঁক স্থানীয় স্বাস্থ্য কেন্দ্ৰত ভৰ্তি কৰোৱায়। তাতে চিকিৎসকৰ এটা দলে কিশোৰজনৰ সকলো স্বাস্থ্য পৰীক্ষাৰ লগতে এক্সৰ জৰিয়তে নাবালকজনৰ পেটৰ ভিতৰত মোবাইল ফোন চাৰ্জ কৰাৰ বাবে ব্যৱহৃত এডাল ইউএছবি তাঁৰ থকা বুলি জানিব পাৰে।

 সমগ্ৰ ঘটনা ধৰা পৰা স্বাস্থ্যকেন্দ্ৰটোত কিশোৰজনৰ চিকিৎসা কৰিব পৰা নগ’ল। উন্নত চিকিৎসাৰ বাবে তেওঁক ফিৰাট বিশ্ববিদ্যালয় চিকিৎসালয়লৈ স্থানান্তৰিত কৰা হয়। দেখা যায় যে তাঁৰৰ মূৰটো ক্ষুদ্ৰান্ত্ৰত প্ৰৱেশ কৰিছে। অস্ত্ৰোপচাৰ বিশেষজ্ঞ ইয়াছিৰ ডোগানে এণ্ড’স্কপিৰ জৰিয়তে পেটৰ পৰা তাঁৰ আঁতৰোৱাৰ সিদ্ধান্ত লয়।

 পৰিকল্পনা অনুসৰি পেটৰ পৰা তাঁৰডাল লাহে লাহে আঁতৰাই দিয়া হয়। দেখা যায় যে ইয়াৰ দৈৰ্ঘ্য ৩ ফুটতকৈও অধিক। কেৱল চাৰ্জিং কৰাই নহয়, নাবালকজনৰ পেটত চুলি বন্ধা এডাল ৰবৰো উদ্ধাৰ হয়। দুয়োটা সামগ্ৰীয়ে কিশোৰজনৰ পেটৰ ভিতৰৰ পৰা একেলগে বাহিৰ কৰে চিকিৎসকে। অৱশ্যে সেই তাঁৰডাল কিশোৰজনৰ পেটত কেনেকৈ সোমাল সেয়া এতিয়ালৈ জানিব পৰা হোৱা নাই।