ডিজিটেল ডেস্কঃ সুদীৰ্ঘ ২১ টা বছৰৰ অপেক্ষাৰ অন্ত পৰিল। ২১ বছৰৰ মূৰত সৌন্দৰ্যৰ মঞ্চত পুনৰ উজলিল ভাৰতীয় নাৰী। ভাৰতক প্ৰতিনিধিত্ব কৰা সৰগম কৌশলে আজি লাছ ভেগাছত অনুষ্ঠিত বৰ্ণাঢ্য অনুষ্ঠানত মিছেছ বৰ্ল্ডৰ মুকুট শিৰত পৰিধান কৰে। । শ্ৰীমতী কৌশলে ৬৩ খন দেশৰ প্ৰতিযোগীসকলক চেৰ পেলাই এই সন্মান আজুৰি আনিবলৈ সক্ষম হয়।
উল্লেখ্য ২১ বছৰৰ পিছত ভাৰতলৈ এই সন্মান পুনৰ উভতি আহিছে। ইনষ্টাগ্ৰামত এই সুখবৰ শ্বেয়াৰ কৰি মিছেছ বৰ্ল্ড প্ৰতিযোগিতা পৰিচালনা সংস্থাটোৱে ,কয় "দীঘলীয়া অপেক্ষাৰ শেষ হৈছে, ২১ বছৰৰ পিছত ভাৰতে ক্ৰাউন পুনৰ ঘূৰাই পাইছে!"
জম্মু-কাশ্মীৰৰ বাসিন্দা সৰগম কৌশলেও এটা ভিডিঅ' শ্বেয়াৰ কৰি খিতাপ জয়ৰ বতৰা বিশ্ববাসীক জনাইছে। সৰগমে কয় "আমি ২১-২২ বছৰৰ পিছত মুকুটটো ঘূৰাই পাইছো। মই বহুত উত্তেজিত। লাভ ইউ ইণ্ডিয়া, লাভ ইউ ৱৰ্ল্ড," । সৰগম কৌশলে ইংৰাজী সাহিত্যত স্নাতকোত্তৰ ডিগ্ৰী লাভ কৰিছে। তেওঁ আগতে ভিঝাগত এগৰাকী শিক্ষয়িত্ৰী হিচাপে কাম কৰিছিল আৰু তেওঁৰ স্বামী ভাৰতীয় নৌবাহিনীত কৰ্মৰত ।
মিছেছ বৰ্ল্ড বিবাহিত মহিলাসকলৰ বাবে প্ৰথম সৌন্দৰ্য প্ৰতিযোগিতা। প্ৰতিযোগিতাখন ১৯৮৪ চনতআৰম্ভ হৈছিল আৰু মিছেছ আমেৰিকা প্ৰতিযোগিতাৰ পৰা এই প্ৰতিযোগিতাৰ আৰ্হি গ্ৰহণ কৰা হৈছিল। ১৯৮৮ চনত এই প্ৰতিযোগিতা মিছেছ বৰ্ল্ড প্ৰতিযোগিতা হিচাপে জনাজাত হৈ পৰিছিল। বিগত বছৰবোৰত, মিছেছ বৰ্ল্ড প্ৰতিযোগিতাত ৮০ খনতকৈও অধিক দেশৰ প্ৰতিযোগীয়ে অংশগ্ৰহণ কৰিছে। ভাৰতে ইয়াৰ পূৰ্বে কেৱল এবাৰহে মিছেছ বৰ্ল্ড খিতাপ জিকিছে। ২০০১ চনত ডঃ অদিতি গোবিত্ৰিকাৰে এই মুকুট লাভ কৰিছিল।
Continue Reading
